“Норманд форматы”ндағы – Рәсәй, Украина, Франция президенттары һәм Германия канцлеры ҡатнашлығындағы — сираттағы осрашыу яҡынса 16 сәғәт дауам итте.
Көн ҡаҙағында — әлеге лә баяғы Украина темаһы. Көткәнгә көтөүҙән дә оҙағырағы юҡ. Айырыуса мәсьәлә тыныслыҡ, мил­ләт-ара татыулыҡ, кеше яҙ­мы­шына ҡағылғанда ваҡыт аяуһыҙ кеүек тойола. Иң мөһим һөҙөмтә — иртәгәнән Украинала барған һуғышты туҡтатыу тураһында килешеүгә өлгә­шел­де. Әлбиттә, быға барыбер һағайып ҡарайбыҙ, шулай ҙа өмөтһөҙ шайтан тигәндәй...
— Минеңсә, күп мәсьәләләргә асыҡлыҡ индерҙек. Беренсенән, 15 февралдән утлы ғәрәсәт туҡтатылырға тейеш. Икенсенән, был да миңә ҡалһа үтә мөһим, билдәләнгән һыҙаттан ауыр ҡоралды алыу тураһында килешелде, — тине Рәсәй Президенты Владимир Путин жур­налистар менән осрашыуҙа.
Ил башлығы белде­реүенсә, “дүрт етәксе” Минск килешеүен үтәүгә йүнәлтелгән саралар тураһындағы документ­ҡа ла ҡул ҡуйған. Шулай уҡ Рәсәй Президенты Дебальцево ҡала­һындағы хәлде дөрөҫ баһалау маҡсатында хәрби эксперттарҙы йәлеп итеү хаҡында ла Порошенко менән килешкән.