Быйыл мартта Бәләбәй ҡалаһында ун бишенсе тапҡыр төбәк-ара “Илһам шишмәләре” шиғриәт фестивале уҙасаҡ.

Дүрт (башҡорт, татар, рус, сыуаш) телдә ижад итеүселәрҙе берләштергән был үҙенсәлекле сараның башлап шиғыр яҙыусы авторҙар, ғөмүмән, ҡәләм тирбәтеүселәр өсөн әһәмиәте һәм маҡсаты тураһында тәфсирләп һөйләп тороуҙың кәрәге юҡтыр, моғайын. Башланғандан алып ул күпме авторға илһам ҡанаттарын ҡуйҙы, ҙур шиғриәт донъяһына фатиха бирҙе. Уларҙың күбеһе Башҡортостандың һәм Рәсәйҙең Яҙыусылар союздарына ағза итеп алынды, китаптарын сығарҙы, әҫәрҙәрен уҡыусылар хөкөмөнә илтеүгә өлгәште! С. Аксаков, М. Цветаева, К. Иванов, Я. Ухсай, Ф. Кәрим, шулай уҡ ҙур әҙәбиәткә юлын бында башлаған Динис Бүләков, Таһир Таһировтар ҡалабыҙҙы илгә Әҙәби Бәләбәй итеп танытты. Ижадҡа ғүмерен, күңел хеҙмәтен бағышлаған әҙиптәргә, шағирҙарға Бәләбәй районы хакимиәте һәм Яҙыусылар союзы тарафынан булдырылған яугир-шағир Фәтих Кәрим исемендәге премия тапшырылып килә.
Башҡортостандың һәм Рәсәйҙең төрлө тарафында ижад иткәндәргә ижад ҡанаттары ҡуйған төбәк-ара “Илһам шишмәләре” фестиваленең ун бишенсеһе Әҙәбиәткә бағышланған һәм Бөйөк Еңеүҙең 70 йыллығын байрам иткән 2015-тә үтә. Иң яҡшы шиғырҙар конкурсында гран-при, бер – беренсе, ике – икенсе, өс өсөнсө урындан башҡа шундай номинациялар ҡаралған:
“Шағир һәм заман” (рус, башҡорт, татар һәм сыуаш телдәрендә яҙыусылар өсөн айырым); “Һүҙ тәьҫирен алдан белеп булмай” (Рәсәйҙә һәм Башҡортостанда Әҙәбиәт йылына бағышлана); “Фестиваль асышы”; “Заман башҡа — заң башҡа” (йәштәр шиғриәте);
“Мөхәббәт ул — шундай изге хис” (һөйөү лирикаһы); “Ул көндәрҙең даны һүнмәҫ” (Бөйөк Ватан һуғышында Еңеүҙең 70 йыллығына бағышланған); “Тоғролоҡ һәм бурыс ялҡыны Беҙҙең юлды яҡтыртһын өсөн” (яугир-шағир Фәтих Кәримдең һәләк булыуына 70 йыл тулыу уңайынан);
“Яратырға, өмөтләнергә һәм йәшәргә” (физик мөмкинлектәре сикләнгән авторҙар өсөн);
“Ҡанат ҡуйҙы миңә фестиваль” – юбилей номинацияһы.
Шиғырҙарҙы (үҙең тураһында ҡыҫҡаса белешмә, фотоһүрәт, адрес менән телефондарҙы күрһәтеп) февраль аҙағынаса “Белебеевские известия” – “Бәләбәй хәбәрҙәре” гәзите редакцияһына ебәрергә кәрәк. Адресы: г. Белебей, ул. Мало-Луговая, 53 а, электронная почта: [email protected].