Һуңғы йылдарҙа Сибай урамдары танымаҫлыҡ булып үҙгәрҙе: күркәм яңы йорттар ҡалҡа, иҫкеләре һүтелә, яңы социаль объекттар сафҡа инә. Яңы йорт туйлағандар араһында Бөйөк Ватан һуғышы ветерандары, уларҙың тол ҡатындары, запастағы хәрбиҙәр, етем балалар, күп балалы һәм йәш ғаиләләр бар. Шулай уҡ граждандарҙы авария хәлендәге йорттарҙан күсереү программаһы нигеҙендә лә мохтаждар яңы фатирлы булды.
Ҡаланың төҙөлөш индустрия­һын “Ремстройцентр” яуаплылы­ғы сикләнгән йәмғиәтенән башҡа күҙ алдына килтереп тә булмай. Татыу һәм берҙәм коллективтың тупланыуы, хеҙмәт күрһәткес­тә­ре, төҙөлөш мәсьәләләренә за­ман­са һәм эшлекле ҡарашы ме­нән айы­ры­лып торған был ҡеүәтле ойош­ма күп тармаҡлы хужалыҡ ком­плек­сын хәтерләтә. Рафаил Исмәғи­лев етәкселеген­дәге коллектив 2005 йылдан алып төҙөлөш майҙанында үҙ урынын лайыҡлы биләй. Йәмғиәттә 90 кеше, уларҙың уртаса эш хаҡы 23-24 мең һум тәшкил итә.
– Ҡасандыр Башҡортостан баҡыр-көкөрт комбинаты база­һын­да барлыҡҡа килгәйнек, – ти Рафаил Ибраһим улы. – Тәүҙә­рәк комбинаттың төрлө төҙөлөш нөктәләрендә эшләнек, артабан үҙебеҙ айырым йорттар, соци­аль объекттар төҙөүгә ба­тыр­сылыҡ иттек. Һуңғы ваҡытта авария хә­лендәге йорттарҙан күсенеүсе­ләр өсөн 24 фатирлы ике йорт төҙөнөк. Әле художество мәк­тә­бен һа­лыу менән мәшғүлбеҙ. Өфөлә үткән тендерҙа тап беҙ­ҙең ойош­маның еңеп сығыуы – оло шат­лыҡ. Был мәктәп ҡала­быҙ­ҙың тыуған кө­нөнә иң ҙур бүләк буласаҡ.
Быйыл юбилей йылы – Си­бай ҡалаһына 60 йыл тула. Уны ла­йыҡлы ҡаршы алыу буйынса байтаҡ эште тормошҡа ашырыу, бик күп объектты фай­ҙаланыуға тапшырыу күҙ уңында тотола. Әлбиттә, бында “Рем­с­трой­центр” яуаплылығы сиклән­гән йәм­ғиәте мөһим урынды би­ләйәсәк.