Өфө районындағы Шамонин ауылында тағы бер балалар баҡсаһы асылды. Ул да, тәүгеһе кеүек үк, 160 урынға иҫәпләнгән, шулай ҙа 200-ләп сабыйҙы һыйындырыр, моғайын, сөнки күрше ауылдарҙан да күптәр сираты еткәнен көтә.

Шуныһын билдәләргә кә­рәк: бер нисә йыл элек кенә был урында хатта бер таяу ҙа юҡ ине. Республика ҡаҙнаһынан 90 миллион һумдан ашыу аҡса бү­ленгәс, төҙөүселәр ең һыҙғанып эшкә тотоноп, алһыҙ-ялһыҙ йыл ярымда ике ҡатлы заманса бинаны һалып бөттө, биләмәне лә төҙөк­лән­де­реп, баҡсаға илткән юлды ла өл­гөрт­тө. Һигеҙ төркөм өсөн йоҡо, уйын бүлмәләре генә түгел, һәйбәт итеп йыһазлан­ды­рылған физкультура, музыка залдары ла бар бында.
“Аҡбуҙат” тип аталған яңы баҡса тыштан да бик матур биҙәлгән. Балалар әйтмешләй, әкиәт донъя­һы­на оҡшаған. Әүһәләйҙәр, һыр­ғалаҡ­тар, уйын өсөн аласыҡтар – барыһы ла бәләкәстәрҙең зауы­ғына ярашлы. Биләмәлә хәүеф­һеҙлек тәьмин итеү маҡса­тында даими видеокүҙәтеү алып барылыуын да әйтеп үтеү урынлы.
Шамонинда йәшәгәндәрҙең күп­селеге Өфөгә йөрөп эшләй, шуға балалар баҡсаһы мәсьәләһе был ауыл өсөн ифрат мөһим. Хәҙер инде ауырлыҡтар – артта. Өҫтә­үенә 50-гә яҡын кешегә артабан баш ҡала юлын көн дә тапайһы түгел, уларға үҙ ауылында эш урыны булды. Милли мәнфәғәтте иҫәпкә алып, “Аҡбуҙат”та дәрес­тәрҙе башлыса башҡорт телендә ойошторорға ҡарар иткәндәр.