Башҡортостан Яҙыусылар союзында күренекле башҡорт шағиры, ялҡынлы прозаик, драматург, публицист Ғәзим Ғәзиз улы Шафиҡовтың хәтер кисәһе үтте. Әҙипте иҫкә алырға, шиғырҙарын уҡырға һәм уның тураһында фекерҙәре менән уртаҡлашырға ҡәләмдәштәре, дуҫ-иштәре, яҡындары һәм ижад һөйөүселәр йыйылды.

— Милли әҙәбиәтебеҙҙең төрлө жанр­ҙарында – поэзия, проза, драматургия, публицистика, тәржемә өлкәләрендә – уңыш­лы эшләгән күре­некле башҡорт яҙыусыһы Ғәзим Шафиҡовты, һис шикһеҙ, тарихсылар, әҙәбиәт һәм сәнғәт белгес­тәре, тәнҡитселәр рәтенә индерергә мөм­кин. Халыҡ тормошоноң ур­таһында ҡай­нап йәшәгән, үҙен уратып алған мөхитте биш бар­мағылай белгән, ысын­бар­лыҡты нескә тойған әҙип – башҡорт әҙәбиәтенә баһалап бөткөһөҙ ҙур өлөш индергән шәхес, – тип билдәләп үтте Яҙыу­сылар союзы идараһы рәйесе Наил Ғәйетбаев. Башҡортостандың халыҡ яҙыусыһы Ҡәҙим Аралбай Ғәзим Ша­фиҡов­тың тормош юлына ҡыҫҡаса байҡау яһап, яҙған хаттарын уҡып ишеттерҙе. Ижадташ дуҫтары Спартак Ильясов, Рәшит Шәкүр, Ирек Кинйәбулатов, Әхмәр Үтәбай иһә яҡты хәтирәләрен телгә алды. Кисә йыр-моң менән үрелеп барҙы.