Башҡортостан Башлығы Рөстәм Хәмитов Рәсәй Федерацияһы Прокуратура хеҙмәткәрҙәре көнөнә арналған тантаналы йыйылышта сығыш яһаны. Республика етәксеһе ведомство хеҙмәткәрҙәрен һәм ветерандарын һөнәри байрамдары менән ҡотлап, Башҡортостандың дәүләт наградаларын тапшырҙы.

Республика етәксеһе прокуратура органдары көс структураларының енәйәтсе­лек, иҡтисади һәм социаль өлкәләге хоҡуҡ бо­ҙоу­ҙарға, экстремизмға һәм коррупцияға ҡаршы көрәш, дәүләт һәм шәхси милекте һаҡлау кеүек эш йүнәлештәрен билдәлә­үен һыҙыҡ өҫтөнә алды.
Рөстәм Хәмитов эшлекле мөхитте яҡ­шыртыуҙы ведомство алдында торған мө­һим бурыстарҙың береһе тип атаны. Уның һү­­ҙ­ен­сә, йыл һайын күҙәтеү органдары тәҡ­диме буйынса пландан тыш тикшереү­ҙәрҙең яртыһынан ашыуын прокуратура кире ҡаға, был иһә бизнесҡа йөкләмәне һиҙелерлек кәметергә мөмкинлек бирә.
– Был эште дауам итергә һәм эшҡыуар­ҙарҙың мәнфәғәтен яҡлау һеҙҙең ҡулда икәнлеген аңларға кәрәк, – тине төбәк етәк­сеһе.
Башҡортостан прокуратураһы илдә иң һө­ҙөмтәле эшләгәндәрҙән һанала, шул уҡ ва­ҡытта хәл итәһе проблемалар ҙа юҡ түгел. Уның хеҙмәткәрҙәре былтыр 178 мең закон боҙоу осрағын асыҡлаған. Был тәңгәлдә хоҡуҡ һағында торғандарҙың эш хаҡы буйынса ғына 400 миллион һум бурысты түләтеүгә өлгә­шеүен атап үтеү ҙә етә. Тантанала уңыш­лы эшләгән 100-ҙән ашыу хеҙ­мәт­кәргә юғары наградалар, рәхмәт хаттары ла тапшырылды.
Республика Башлығы корруп­цияға ҡар­шы көрәштә ошо йүнәлеш буйынса прокуратура органдарына ярҙам итәсәк вә­кил институтын булдырырға тигән тәҡ­дим индерҙе. Бынан тыш, торлаҡ-коммуналь ху­жалыҡ өлкәһен, шул иҫәптән йорт­тарҙы капиталь ремонт­лауҙы күҙә­теүҙе көсәй­тергә, шулай уҡ аҙыҡ-тү­леккә, бензинға хаҡтарҙы, энергия ре­сурс­тарына тариф­тарҙы нигеҙһеҙ артты­рыуҙы ентекле өйрә­нергә ҡушты.
(Сығыштың тулы тексы һәм бүләк­ләнеүселәр исемлеге Башҡортостан Республикаһы Башлығының рәсми сайтында бирелгән).


Рим СОЛТАНБӘКОВ, Прокуратура ветерандары һәм пенсионерҙарының дөйөм Рәсәй йәмәғәт ойошмаһы Баш­ҡортостан төбәк бүлексәһе рәйесе:
– Прокуратура органдарында 32 йыл эш­ләнем. 2012 йылдан иһә ветерандар ойош­маһын етәкләйем. Әүҙем эшмәкәр­лек алып барып, йәш хеҙмәткәрҙәрҙең аттес­тация мәлендә, ант биргәндә ҡат­на­ша­быҙ, прокуратура ор­ган­дары ве­теран­­дары­ның көндәлек мә­­шә­ҡәт­тә­рен­дә, төрлө социаль мәсьә­лә­ләр килеп тыу­ғанда мөм­кин тиклем яр­ҙам ҡулы һуҙырға тыры­шабыҙ. Бынан бер нисә йыл элек тармаҡ тарихын сағылдырған музейға ике бүлмә бирҙеләр. Йыйылған бай экспонаттар Башҡортос­танда был хеҙмәт­тең үҫеше тура­һын­да, ғүмерен хоҡуҡҡа арнаған кешеләр ха­ҡын­да һөйләй.