Донъя кимәлендәге опера йондоҙо, Мария театры һәм Метрополитен-опера солисы, Башҡортостандың халыҡ артисы, “Грэмми” премияһы лауреаты Илдар Абдразаҡов йәш йырсы Иҙел Аралбаевтан “Ижади саҡырыу” хәйриә акцияһы эстафетаһын ҡабул иткәйне.
Яңы йыл алдынан опера йырсыһы республикалағы мәҙәниәт һәм сәнғәт ветерандарына “Башҡортостан” дәүләт концерт залында үткән концертына дүрт саҡырыу билеты бүләк итте һәм уларға арнап Вердиҙың “Эрнани” операһынан Граф де Сильва арияһын башҡарҙы. Башта ул эстафетаны проектта ҡатнашҡан коллегаларына тапшырғайны. Акцияны ойоштороусы “Сәнғәт кешеләре” хәйриә фонды етәксеһе Әлмира Соломинова әйтеүенсә, Илдар Абдразаҡов яңы йыл каникулы осоронда Франциянан ветерандарға сәләм тапшырҙы, саңғы менән тауҙан шыуып төшөүҙе лә уларға арнаны.
Был юлы Абдразаҡов хәйриә акцияһы эстафетаһын Башҡортостандың мәҙәниәт министры, профессор Әминә Шафиҡова менән Башҡорт дәүләт опера һәм балет театрының художество етәксеһе, Өфө сәнғәт училищеһы директоры Владимир Беловҡа тапшырырға ҡарар итте.