Былтыр “Башҡортостан” гәзите редакцияһы башҡорт публицистикаһын үҫтереү, милли матбуғатты тәрән фекерле һәм үткер мәҡәләләр менән байытыу маҡсатында Ризван Хажиев исемендәге премияға ижади конкурс иғлан иткәйне. Яҙмаларға публицистик рух, аналитик фекерләү хас булыуы, авторҙарҙың көнүҙәк проблемаларҙы ентекле яҡтыртыуы төп талап тип билдәләнде.

Премияны биреү буйынса комиссия йыл аҙағына тиклем бик күп мәҡәләне баһалап сыҡты, байтаҡ авторҙың публицислыҡ оҫталығын билдәләне. Лауреатлыҡҡа бер нисә кеше етди дәғүә итһә лә, улар араһынан берәүҙе генә һайлап алырға кәрәк ине. Һөҙөмтәлә “Башҡортостан” гәзите биттәрендә ижтимағи-сәйәси темаға яҙмалар, иҡтисад, торлаҡ-коммуналь хужалыҡ, социаль өлкә тураһында тәнҡит мәҡәләләре менән йыш сығыш яһаған Мәхмүт Хәйрүш улы Хужин иң лайыҡлыһы тип табылды.