– Ҡәҙерле балалар! Һеҙ үтеп барған Мәҙәниәт йылына тос өлөш индерҙегеҙ: тырышып уҡыуҙан тыш, “Сулпылар” конкурсында ҡатнашып, яңы йырҙар өйрәндегеҙ. Барығыҙға ла “еңеүсе” тип өндәшәм! – Шундай һүҙҙәр менән тәбрикләне “Тамыр” балалар һәм үҫмерҙәр телеканалы директоры Гөлназ Ҡолһарина “Сулпылар” телевизион конкурсының гала-концертына һәм бүләкләү тантанаһына йыйылған йәш таланттарҙы.Еңеүселәрҙе ҡотларға танылған милләттәштәребеҙ ҙә килгәйне. Араларында шашкасы Айнур Шәйбәков, боксер Хәбир Сөләймәнов, сәнғәт әһелдәре, эшҡыуарҙар һәм башҡалар бар ине. Улар конкурсанттарға изге теләктәрен еткерҙе, дипломдар, бүләктәр тапшырҙы.
Һөҙөмтә түбәндәгесә: III урынды Ишембайҙан Аделина Йосопова, Миәкәнән Резеда Арыҫланова, Өфөнән Айгөл Ибраһимова, Туймазынан Дарина Миңләхмәтова һәм Көйөргәҙенән Илшат Рамазанов бүлешһә, II баҫҡысҡа Ейәнсуранан Инйәр Ишмырҙин, Баҡалынан Динис Нуретдинов (ул “Тамашасы һөйөүе” призына ла лайыҡ булды), Дәүләкәндән Алмас Ғәзизов күтәрелде. I урынды иһә Сибайҙан Гөлсиә Мараканова, Әбйәлилдән Әлиә Йәнбирҙина һәм Благоварҙан Ләйсән Хәкимова яуланы.
Ә төп бүләккә Баймаҡ районының Буранбай ауылынан VI класс уҡыусыһы Ильяс Ҡотоев лайыҡ булды! Баҫҡан ерендә ут сәсеп торған малай конкурстың тәүге турында уҡ башҡорт халыҡ йыры “Урал”ды башҡарып, күптәрҙе һоҡландырғайны. Әсәһе әйтеүенсә, Ильяс ике йәш ярымлыҡ сағынан йырлай башлаған. Ауыл сәхнәһендә “Илсе Ғайса”ны башҡарғанын әле лә ғәжәпләнеп иҫкә алалар. Олатаһы менән өләсәһе, атаһы ла йырларға әүәҫ икән. Ильяс тыуған төбәгендә уҙғарылған “Ирәндек моңдары” конкурсында призлы урындар алған, быйыл Республика көнөндә Өфө сәхнәһендә сығыш яһаған. Буранбай мәктәбендәге “Еҙ үксә” бейеү ансамблендә лә ихлас шөғөлләнә.Ә бына конкурста III урынды яулаған Ишембай ҡыҙы Аделина Йосопова йырҙарҙы үҙаллы өйрәнә икән. Тыуған ауылы Иҫке Һәйеттәге башланғыс мәктәпте тамамлап, әле уҡыуын күрше Ҡолғонала дауам иткән йәш “йондоҙ” мәртәбәле бәйгелә уңыш ҡаҙаныу мөмкинлеген биргән “Тамыр”ға ҙур рәхмәтле.