Йәмғиәттәге барлыҡ изге башланғыстарға нигеҙ һалған педагог­тарҙың, айырыуса халҡының иң ҙур хазинаһын ҡурсалаған тел һәм әҙәбиәт уҡытыусыһының хеҙмәте баһалап бөткөһөҙ. Уларға хөрмәт күрһәтеүҙе, белемдәрен камиллаштырыуҙы, даими аралашыу өсөн мөмкинлек тыуҙы­рыу­ҙы дәүләт төп бурыс­тарының береһе тип һанай.

Йыл уҡытыусыларын бил­дәләү кон­курс­тары бы­йыл да киң майҙан йыйҙы. Уларҙа белем биреүҙә яңы технологиялар, заманса алымдар ҡулланыуға, ижади фекерләүгә өҫтөнлөк бирелде.
Салауат ҡалаһында уҙғарылған “Баш­ҡорт теле һәм әҙәбиәте йыл уҡытыусыһы” бәй­геһендә 55 педагог көс һынашты. Конкурс еңелдән булманы: йылдан-йыл ҡәтғиләшә бар­ған шарттарға яңы федераль дәүләт бе­лем биреү стан­дарт­тарының да өҫ­тәлеүе уҡы­тыу­сы­ларҙы төрлө яҡлап фекер йө­рөтөргә мәжбүр итте. Шулай ҙа һөнәрен мөкиббән ярат­ҡан, йәш быуынға сифатлы белем, яҡшы тәрбиә биреү, күңелдәргә туған телгә һөйөү һалыу маҡсаты менән янып йәшәгән педагогтар баҙап ҡалманы, һәр береһе һынауҙы лайыҡлы үтте. Араларынан Ейәнсура райо­нының Иҫәнғол баш­ҡорт гимназия-интернаты уҡы­тыу­сыһы Гөлбаныу Исмәғилеваға етеүсе табылманы, ул конкурстың төп бүләген яуланы.
– Еңеүҙә ике тиҫтә йыллыҡ хеҙмәт тәжри­бәмдең өлөшө ҙур, – тине Гөлбаныу Ирек ҡыҙы. – Уҡытыуҙағы яңы алымдарҙы өйрәнеү ҙә ныҡ ярҙам итте.