Рәсәйҙең Федерация Советында төбәктәр палатаһының көҙгө сессияһы мәлендә Федерация Советының яңыртылған составы раҫланып, палата һәм комитеттар етәкселәре һайланғайны. Петербургтан сенатор Валентина Матвиенко артабан да Федерация Советы Рәйесе вазифаһын үтәйәсәк. Ә бына Мәғариф, фән һәм мәҙәниәт комитеты рәйесенең беренсе урынбаҫары итеп бер тауыштан беҙҙең Лилиә Ғүмәрованы һайланылар.

Башҡортостан Хөкүмәте Премьер-министры­ның элекке урынбаҫары Лилиә Ғүмәрова хәҙер Рәсәйҙең Юғары палатаһында республиканың баш­ҡарма власын сағылдыра. Ул — Башҡортостандан сенатор булған тәүге ҡатын-ҡыҙ.
Лилиә Салауат ҡыҙы, ошондай яуаплы вазифаға һайланыуына аңлатма биреп: “Мәғариф, фән һәм мәҙәниәт өлкәһендә Башҡортос­танға ғорурланырлыҡ нигеҙ бар, шул уҡ ваҡытта эште әүҙемләшт­ерерлек стратегик йүнәлештәр ҙә байтаҡ”, — тип билдәләне.
Ул Башҡортостандан сенатор булараҡ ошо эштә тулыһынса ҡатнашырға, республика менән Федераль үҙәк араһындағы мөнәсәбәттәрҙең аныҡ уйланылған системаһын төҙөү йәһәтенән төбәккә ярҙам итергә әҙер.