Мәскәүҙә Башҡортостан Президенты Рөстәм Хәмитов Рәсәй Федерацияһы Дәүләт Советының һәм ил Президенты ҡарамағындағы Мәҙәниәт һәм сәнғәт советының дәүләт мәҙәни сәйәсәтен тормошҡа ашырыу мәсьәләләренә арналған берлектәге ултырышында ҡатнашты.

Сараны асып, ил етәксеһе Владимир Путин: “Тамамланып килгән Мәҙәниәт йылы әһәмиәтле ваҡиғаларға һәм сараларға бай булды, иң элек Рәсәй Федерацияһы төбәктәрендә был темаға ҙур иғтибар бирелде”, — тип билдәләне. Рәсәй Прези­денты үҙенең Указы менән Дәүләт мәҙәни сәйәсәте нигеҙ­ҙә­рен раҫлауы хаҡында хәбәр итте. Уның әйтеүенсә, доку­ментта мәҙәниәт тарихи байлыҡ һәм мираҫ рәүешендә ҡабул ителә.
Үҙенең сығышында Владимир Путин шулай уҡ ижад азатлығын тәьмин итеү, халыҡтарҙың мәҙәни мираҫын һаҡлап ҡалыу һәм файҙаланыу, телдәрҙе, мәҙәниәтте үҫтереү, шәхес өсөн уңайлы мәғлүмәти мөхит булдырыу мәсьәләләрен күтәрҙе.