Ғәҙәттәгесә, йыл аҙағында киң мәғлүмәт сараларының иң яҡшы хеҙмәткәрҙәре бүләкләнде. Көтөп алынған байрамды республиканың Матбуғат һәм киң мәғлүмәт саралары буйынса агентлыҡ менән Журналистар союзы ойошторҙо.

– Һеҙгә хеҙмәтегеҙ өсөн ҙур рәхмәт белдерәм, – тине Агентлыҡ етәксеһе Борис Мелкоедов, тантанаға килгәндәрҙе байрам менән ҡотлап. – Республикала был өлкәлә эшләгән журналистар – өс мең тирәһе, ә уларҙың хеҙмәтенән күпме кеше файҙалана!
Еңеүселәр быйыл да онлайн-тауыш биреү аша билдәләнде. “Йыл журналисы” номинацияһында утыҙҙан ашыу кандидат теркәлгәйне. Араларынан Күгәрсен районының “Мораҙым” гәзите хәбәрсеһе Айгөл Арыҫланбәкова еңеүсе тип табылды.
Төрлө өлкәне яҡтыртҡан журналистар айырым номинацияларҙа билдәләнде.