Учалы сәнғәт һәм мәҙәниәт колледжына башҡорт композиторы Салауат Низаметдиновтың исеме бирелде. Башҡортостан Хөкүмәтенең рәсми порталында ошо турала хәбәр бар.
Салауат Әхмәҙи улы Низаметдинов — Рәсәйҙең һәм Башҡортостандың атҡаҙанған сәнғәт эшмәкәре, СССР Композиторҙар союзы ағзаһы, бик күп опера, хор, инструменталь әҫәрҙәр, йырҙар һәм романстар авторы, Прагала уҙғарылған Халыҡ-ара һуҡыр ком­позиторҙар конкурсы, “Филантроп” халыҡ-ара премияһы лауреаты. Учалы районында тыуған данлыҡлы сәнғәт әһеле Башҡортостандың Композиторҙар союзы рәйесе булып та эшләне.
Салауат Низаметдинов исемен йөрөтәсәк Учалы сәнғәт училищеһы 1972 йылда асылған. Дүрт тиҫтә йыл эсендә унда ике меңдән ашыу белгес әҙерләнгән.