Иглин районында, “500 ферма” программаһына ярашлы, тәүге малсылыҡ бинаһы сафҡа индерелде.

2012 йылда программала ҡатнашыу теләген белдергән Альберт Мәсәғүтов 200 баш малға иҫәпләнгән һыйыр аҙбарын капиталь төҙөкләндереүҙән башлай эште. Яңы ҡорамалдар, тоҡомло малдар һатып ала. Шул осорҙа уҡ һөт эшкәртеү цехын аса. Һөҙөмтәләр булдыҡлы етәксене тағы ла бер ферма төҙөүгә илһамландыра. Яңы объект төҙөлөшө 14 миллион һумға төшә. Программа шарттарына ярашлы, был күләмдең яртыһын тиерлек дәүләт субсидиялай. Егәрле хужа өлгәшелгәндәрҙә туҡталып ҡалырға йыйынмай — киләһе йыл быҙау аҙбары һалырға, һауын һыйырҙар һанын тағы ла 200 башҡа арттырырға ниәтләй.