Учалы прокуратураһы рөхсәтһеҙ күпләп ағас ҡырҡыуҙа ғәйепләнгән өс кешегә ҡарата асылған енәйәт эшен судҡа ебәргән.

Тикшереү һөҙөмтәләренә ҡарағанда, Учалы урмансы­лығындағы инженер үҙенең ике танышын йәлеп итеп, енәйәти төркөм төҙөй. Енәйәтселәр ике йыл дауамында ауылдашта­рының паспорт күсермә­лә­рен алып, уларҙың исе­ме­нән торлаҡ төҙөүгә 150 кубометр ағас биреүҙе һорап ғариза яҙа. Ошо документтар нигеҙендә һатып алыу-һатыу килешеүҙәре төҙөлә. Был договорҙарҙы улар ағас әҙерләү менән шөғөлләнгән эшҡыуарҙарға тәҡдим итә. Тегеләре контракт өсөн 490 мең һум аҡса һәм ВАЗ-2114 автомобиле менән түләй.
Законһыҙ ғәмәлдәр һөҙөмтәһендә урман фондына 3,8 миллион һумлыҡ зыян килтерелә. Асыҡланыуынса, төркөм ағзаларының береһе, ҡарағай һәм ҡайын ағастарын ҡырҡып, туғыҙ миллион һумға һатҡан.