— Дауай, Алмаз, һыр бирмә! — Һынатма, Ленар!
Бындай һүҙҙәрҙе йыш ишетә Балтас егеттәре. Үҙҙәре шөғөлләнгән спорт залында ғына түгел, республика, Рәсәй ярыштарына оҙатҡанда ла дуҫтары, ата-әсәһе ошо һүҙҙәрҙе ҡабатлай. Ленар Шәрәфиевтең тренеры Ирек Камалов менән Алмаз Хәбибуллиндың тренеры Айваз Сәфүтдинов тәрбиәләнеүселәренең ҡулбашына еңелсә ҡағыла: нисауа, һеҙ еңә торған егеттәр!
Ленар Балтастың 1-се мәктәбенең ХI класында уҡый. Милли көрәш менән IV кластан алып шөғөлләнә. Яулаған миҙалдарын килтереүен һорағас, өҫтәл тулды ла ҡуйҙы: йәмғеһе 25 дана! Фотоға төшөрөргә бер нисәһен генә һайлап алдыҡ.
— Иң тәүҙә район спортсылары араһында өсөнсө урынды алғайным, һуңынан республика ярыштарына йөрөй башланым, — ти Ленар. — Көрәшкән һайын көрәшке килә...
Бөгөн Шәрәфиев — спорт мастерлығына кандидат. Әйткәндәй, уның бер туған ағаһы Айҙар ҙа — кандидат, тик гер күтәреү буйынса. Ата-әсәһе Альфред менән Эльмира улдары өсөн шатланып бөтә алмай. Әлбиттә, бер нәмә лә еңел бирелмәй. Әйтеүе генә анһат, ике тапҡыр Башҡортостан чемпионы, ике тапҡыр көмөш миҙалға лайыҡ булыуы, етмәһә, Ҡазанда үткән халыҡ-ара ярышта икенсе урынға сығыр өсөн, ай-һай, күпме көс талап ителә.
Икенсе геройыбыҙ Алмаз Хәбибуллин армспортта Рәсәй буйынса бронза миҙалға лайыҡ булған. Бөгөн 2-се мәктәптең ХI класында белем ала.
— Үҙемде сыныҡтырыр, көс күберәк булһын өсөн спорт залына барғайным, шунда уҡ Айваз ағай, ошо спорт төрөн тәҡдим итеп, минең менән ныҡлап шөғөлләнә башланы, — ти ул.
Алмаз үҙе тураһында аҙ һөйләй, шулай ҙа уның тренеры Айваз Сәфүтдиновтан үҫмерҙең уҙған йыл Башҡортостан чемпионы булғанлығын, унан алда Өфөлә — көмөш миҙал, 2013 йылда Рәсәй чемпионатында бронза яулауын белдек. Бөгөн Алмаз тағы ярышҡа әҙерләнә. Был юлы үҫмерҙәр араһында ғына түгел, ә йәштәр менән көс һынашасаҡ. Әйткәндәй, әлегә тиклем ярыштарға барған саҡта ла Хәбибуллиндың йәшенә ышанмайыраҡ ҡарағандар: шулай булмай ни, ике метрға яҡын бәһлеүән кәүҙә, көс-дәрт урғылып торған ҡараш — өлгөрөп еткән спортсы бит!