Кисә Дәүләт Йыйылышы — Ҡоролтай йортонда “Берҙәм Рәсәй” партияһының төбәк бүлексәһе конференцияһы булды. Сарала партия ағзалары, Дәүләт Думаһы, Дәүләт Йыйылышы — Ҡоролтай депутаттары, “Берҙәм Рәсәйҙең Йәш гвардияһы” ойошмаһы вәкилдәре ҡатнашты. Төбәк бүлексәһе эшмәкәрлеге, киләһе йылға маҡсаттар тураһында “Берҙәм Рәсәй” партияһының Юғары Советы ағзаһы, Башҡортостан Президенты Рөстәм Хәмитов сығыш яһаны.
Башҡортостан, илдең башҡа төбәктәре менән сағыш­тырғанда, беренсел бүлексәләр һаны буйынса алдынғы. Бөгөн республикала шундай 3685 ойошма уңышлы эшләй, улар һәр ваҡыт иғтибар үҙәгендә. Шуға ла 2014 йылдың партия эшмәкәрлеге сиктәрендә “Беренселдәр йылы” девизы аҫтында үтеүе юҡҡа түгел.
Был башланғысҡа “Берҙәм Рәсәй” партияһының Башҡортостан бүлексәһе лә әүҙем ҡушылған — Баймаҡ, Мәсетле, Йәрмәкәй, Илеш, Ҡариҙел райондарында, Өфө, Күмертау, Стәрлетамаҡ, Нефтекама ҡалаларында форумдар, семинарҙар ойошторолдо. Партияның урындағы һәм беренсел ойошмалары араһында конкурс та иғлан ителгәйне. Конференцияның һуңғы өлөшөндә еңеүселәр билдәләнде.