Күренекле сәсән Шафиҡ Әминев-Тамъяниҙың бүләһе, Әбйәлил районы башҡорттары ҡоролтайы рәйесе Ишморат Әминев ата-олаталары тыуып үҫкән Әбделғәзе ауылы халҡына 32 дана “Башҡортостан”-Йома”ны бүләк итте.

— Ауылда бөгөн күберә­ген оло йәштәгеләр көн итә. Уларҙың һәр береһенең — үҙ мәшәҡәте. Кемдер матбуғатты алдырырға теләһә лә, матди хәле мөмкинлек бирмәй. Ваҡ-төйәк менән ваҡыттың үтеп китеүе лә сәбәпсе булыуы мөмкин. Атайым мәрхүм ғүмер буйы гәзит-журналдарҙан айырылманы, сәләмәт тормош алып барҙы. Ул беҙҙең күңелдә милли рух уятты, тыуған ергә һөйөү тәрбиәләне. Үҙе һәр саҡ халҡым, атайсалым тип йәшәне. Ә сәсән Шафиҡ Әминев-Тамъяниҙың вариҫтары булыу беҙгә икеләтә ғорурлыҡ өҫтәй. Шундай мөхиттә тыуып үҫеп, нисек инде маңҡорт булыу мөмкин? — ти Ишморат Шамил улы.
Ысынлап та, халыҡта “Атайыңдың ғына улы булма, халҡыңдың да улы бул” тигән әйтем йәшәй. Рухлы һәм сәмле Ишморат Әминевкә “Афарин!” тиергә генә ҡала. Милләт­тәштәребеҙ араһында тап уның кеүек ир-егеттәр күберәк булһа ине.