Ер йөҙөндә байрамдар ифрат күп, әммә шуларҙың иң күркәме — Әсә көнө. Шатлыҡтарҙы ла, ҡайғыларҙы ла үҙенең киң күңеленә һыйҙырған, мәшәҡәтле бала тәрбиәләү бурысын иңенә алған, тормош ҡото, йәшәү йәме булған әсәләргә ниндәй генә ихтирам, рәхмәт һүҙҙәрен әйтһәң дә аҙ булыр төҫлө. Республика рус дәүләт драма театры фойеһында береһенән-береһе ҡупшы кейенгән, йөҙҙәренән нур китмәгән ҡатын-ҡыҙҙар менән осрашыу барыбыҙҙың да кәйе- фен күтәрҙе. Әйтерһең дә, ябай ҡыр сәскәләренән, көйәҙ рауза, ғорур орхидеянан йыйылған сағыу гөлләмәгә юлыҡтыҡ. Иң тәүге танышыбыҙҙы – донъяға ихлас йылмайыу менән баҡҡан мари ҡатыны Любовь Иманғолованы ҡайнар ҡояшты хәтерләткән көнбағыш сәскәһенә оҡшатыуыбыҙ юҡҡа түгел. Үҙенең өс балаһын үҫтереп, оло тормош юлына сығарған һәм ғаиләһенә йәнә алты етемде һыйындырған әсәнең батырлығы, шәфҡәтлелеге һоҡландыра ла, аптырата ла. Төрлө милләт балаларын бер усҡа туплап, наҙлы һүҙҙәре, изгелеге менән сабыйҙарҙың ҡатҡан күңелен иретә алған Любовь ханымдың көндәлек хәстәрен самаларға була. Дүрт баланы иртән Шаран мәктәбенә автобуста оҙатаһы, ҡаршылайһы, дәрестәрен тикшерәһе, техникумда уҡығандарын да хәстәрләйһе, ғаилә- ләренең хәлен белешәһе... Ә унан тыш күпме йорт-ҡура мәшәҡәттәре!
– Балаларҙың береһен дә айырмайбыҙ, барыһы ла үҙебеҙҙеке. Берәйһен аҙ ғына ҡыйырһытһалар ҙа күңелгә ҡыйын, — ти әсә. Матур сараны төрлө райондарҙан килгән бер төркөм ҡатын-ҡыҙға “Әсәлек даны” миҙалын тапшырыу тантанаһы тағы ла йәмләй төштө. Күп балалы әсәләрҙе хөрмәтләү йөҙөнән республикала булдырылған был награданы ете меңгә яҡын әсә алды ла инде.
Башҡортостан Хөкүмәтенең Премьер-министры урынбаҫары Салауат Сәғитов, һәр береһе тураһында әллә күпме маҡтау, рәхмәт һүҙҙәре әйтерлек 15 әсәгә “Әсәлек даны” миҙалын тапшырып, уларҙы күркәм байрам менән ҡотланы. Рус дәүләт драма театры артистарының Мостай Кәримдең “Ярлыҡау” повесы буйынса ҡуйған спектакле тамашасыларға үҙенсәлекле байрам бүләге булды.