Темәс ауылында Баймаҡ ПМК-һының кирбес заводы янында яңы асылған ағасты тәрән эшкәртеү цехында ҡыҙыу эш бара. Яҙ ғына нигеҙ һалынған бина төҙөлөп, бында Италия, Ҡытай һәм Рәсәйҙә етештерелгән өр-яңы 13 станок урынлаштырылған. Силәбе һәм Мәскәү ҡалаларынан белгестәр килеп, эшселәрҙе махсус ҡорамалдарҙы ҡулланырға өйрәткән. Әле бында алты кешегә эш урыны булдырылған. Мәҫәлән, тәжрибәле ағас оҫтаһы Зөфәр Ахунйәнов заманса йыһаздарҙан бик ҡәнәғәт. “Эшләүе күпкә еңелерәк тә, уңайлы ла!” — ти ул. Ошо йүнәлештә уҡып, хеҙмәт юлын башлаған улы Азат та атаһынан өлгө ала.
Цех мастеры Данил Низамов әйтеүенсә, улар ағастан евротәҙрә, ишек, иҙән таҡтаһы, блок-хаус, вагонка етештерәсәк. Инвестиция күләме – 18 миллион һум.
Сибай ҡалаһында үткән тәүге инвестиция форумында төҙөлгән килешеүгә ярашлы, райондың төпкөл ауылдарының береһе Бетерәлә “Башагрофин” яуаплылығы сикләнгән йәмғиәттең күҙәтеү советы рәйесе Усман Исаев ағас эшкәртеү буйынса яңы производствоны сафҡа индергән. Ағасты цилиндр формаһында етештереү буйынса фин ҡорамалы ҡайтарылған. Бөгөн төҙөлөш баҙарында ағастың бындай төрөнә ихтыяж айырыуса ҙур. Бурсанан төҙөлөш материалы етештергән айырым цех төҙөүҙе лә башлағандар.Бетерәнең уңған эшҡыуарҙары — ағалы-ҡустылы Тимур менән Илсур Нәбиуллиндарҙың ағасты тәрән эшкәрткән һәм заманса төҙөлөш материалдары етештергән производствоһы ла иғтибарға лайыҡ. Яңы цех ун кешегә эш урыны булдырған, хеҙмәткәрҙәрҙең барыһы ла ошо ауылдан. Мәҫәлән, Айзилә Йосопованың тилбер ҡулдары станоктан сыҡҡан евровагонканы йәшен тиҙлегендә алып, тиҙ генә икенсе урынға өйөп тә ҡуя. Эшенән ҡәнәғәт Айзилә: хеҙмәт хаҡы ла юғары, бында оҡшай, ти ҡыҙ.
Илсур Нәбиуллин әйтеүенсә, күптән түгел сафҡа ингән цех бөтә талаптарға яуап бирә, иң мөһиме — уңайлы шарттар булдырылған. Әле бында евровагонка, блок-хаус, фальшбрус, шпунтовка сығарыла. Заман талаптарына яуап биргән ҡорамалдар сит илдә етештерелгән. Шуныһы иғтибарға лайыҡ: ағалы-ҡустылы Нәбиуллиндар ағасты эшкәртеү менән генә шөғөлләнмәй, ә ике ҡатлы, бөтә талаптарға яуап биргән коттедждар ҙа төҙөй. Тиҙҙән шуларҙың өсәүһе Баймаҡта файҙаланыуға тапшырыла.Былар барыһы ла көньяҡ-көнсығыш райондарҙы үҫтереү буйынса ҡабул ителгән программаның ысынбарлыҡта тормошҡа ашырылыуына асыҡ миҫал. Аҡрынлап булһа ла, һөҙөмтәләр күренә, эш ыңғай яҡҡа бара, урманға бай төбәктә, ниһайәт, ағас эшкәртеү буйынса етештереүҙең алға китеүе һөйөндөрә.