– Атайым шәп умартасы булды, – тип башланы һүҙен ветеран. – Үҙем дә шул шөғөлдө үҙ итәм. Тыуған яғым Мишкәлә әле умар­та тотам, унда ҡырҡтан ашыу дә­дә­нем бар. Быйыл тоннанан ашыу бал алдым...
Ион Мортаза улы әйтеүенсә, был эштә уға кейәүе ярҙам итә. Йыл да уңыш алғас, уның бер ни тиклем өлө­шөн балалар йортона тапшыралар.
Инде ғүмеренең туғыҙынсы тиҫ­тәһен тултырып килһә лә, аҡһаҡал киләсәктә кәсебен тағы киңәйтергә ниәтләй.
– Яңыраҡ республикабыҙҙың Ауыл хужалығы министрлығы умар­тасылыҡ өсөн ҡуртымға биш биләмә биргәйне. Бына шул май­ҙанды нисектер файҙаланырға кәрәк, – ти ул хәстәрлекле йөҙ менән. – Башҡортостан Ҡытай менән тығыҙ аралаша бит. Бәлки, улар ошо ерҙә умарта комплексы төҙөр? Бына шул илдән инвестор табыу ниәтендә йөрөйөм. Тик кемгә мөрәжәғәт итергә белмәйем. Шуға һеҙгә килдем дә инде...
Бабай оло йәштә булһа ла, уның аныҡ фекер йөрөтөүе, заман яңылыҡтарынан ҡалышмауы, ил хәстәре менән йәшәүе һоҡ­ландыра.
Ысынлап та, Башҡортостан менән Ҡытай араһындағы хеҙмәт­тәшлек нығына бара. Быйыл рес­публикабыҙ Президенты Рөстәм Хәмитов Цзянси провинцияһы губернаторы Лу Синьше менән осрашты. Эшлекле сәфәр ба­ры­шында ике төбәк араһындағы хеҙмәттәшлек тураһында килешеү ҙә төҙөлгәйне. Ҡытай вәкиле белдереүенсә, ике яҡтың граж­данлыҡ авиацияһы, энергетика, ауыл хужалығы, автомобиль төҙөү өлкәһендәге иҡтисади бәйләнеш­тәре отошло булмаҡсы. Уҙған аҙнала иһә Башҡортостан делегацияһы сираттағы мәртәбә Ҡытайға эшлекле сәфәр ҡылды. Нәҡ ошо ваҡытта Гунцинчэн ҡалаһында “Башҡорт балы” магазины асылды.
Ошоларҙы иҫәпкә алғанда, Ион Мортазиндың тәҡдиме иғтибарға лайыҡ. Бәлки, уның да фекерен ишетеүсе булыр.