Ҡала мәҙәниәт йорто сәхнәһендә “Йәш ғаилә-2014” республика конкурсының төбәктәрҙә уҙғарылған бәйгеһендә еңеүселәр сығыш яһаны. Ҡатнашыусылар Өфө, Учалы, Нефтекама, Ишембай, Әбйәлил, Стәрлетамаҡ райондарынан килгәйне.
Гран-приға Өфөнән Юриндар лайыҡ булды. Өс балалы йәш ғаилә ижади һәләттәре менән һоҡландырҙы. Улар баш ҡалала үткән конкурстың төп призына — автомобилгә эйә булғайны.
Беренсе урынға Әбйәлилдән Хәлиловтар сыҡты. Икенсе, өсөнсө урындарҙы Өфөнән Шакировтар менән Ишембайҙан Ғилмановтар уртаҡлашты. Уларға Башҡортостандың Йәштәр сәйәсәте һәм спорт министрлығынан ҡиммәтле бүләктәр һәм дипломдар тапшырылды.
“Йәш ғаилә” конкурсы республикала 1998 йылдан уҙғарыла. Бәйге шарттары буйынса унда 35 йәшкә тиклемге 5-тән 10 йәшкәсә балалары булған парҙар ҡатнаша.