Сөйөмбикә менән Барый Нурғәлиндәр – ҙур ихтирамға лайыҡ кешеләр. Ғаилә башлығы заманында ауыр һуғыш юлдарын үтеп, орден-миҙал тағып ҡайтһа, ҡатыны – тыл ветераны, Герой әсә. Нурғәлиндәр ғаиләһендә ун бала үҫкән, барыһы ла тормошта үҙ урынын тапҡан. Араларынан Хәлиҙә Барый ҡыҙы бөгөн – БДУ-ның Сибай институтында сит телдәр кафедраһы мөдире, филология фәндәре кандидаты, профессор.
Ошо уҡыу йортона нигеҙ һалған педагогтарҙың береһе ул. Дөйөм хеҙмәт стажы 32 йыл булһа, шуның 25-ен Сибай институтына бағышлаған. Мөдирлектән тыш, уҡыу йортоноң ғалимдар кәңәшмәһе ағзаһы ла.
Хәлиҙә Барый ҡыҙы – ике монография, 15 уҡытыу-методика әсбабы, 80-гә яҡын фәнни хеҙмәт авторы. Оҫта етәксе булараҡ, сит телдәрҙе уҡытыу йәһәтенән даими һөнәри анализдар үткәрә, хеҙмәттәштәренән юғары эш сифаты, һөҙөмтәлелек талап итә. Бер нисә йыл элек сит телдәр кафедраһы Сибай институтында иң яҡшыһы тип танылды, Х. Нурғәлина үҙе “Иң яҡшы кафедра мөдире”, “Иң яҡшы доцент” тип билдәләнде. Былтыр иһә Хәлиҙә Барый ҡыҙы Башҡортостан Хөкүмәтенең грантына лайыҡ булды. Тырыш, маҡсатлы педагог фән өлкәһендәге һөҙөмтәле эшмәкәрлеге өсөн шулай уҡ төрлө йылдарҙа республика Мәғариф министрлығының, Сибай ҡалаһы хакимиәтенең, уҡыу йортоноң бихисап маҡтау ҡағыҙы, рәхмәт хаттары менән бүләкләнде.
Хәлиҙә Нурғәлина – хеҙмәттәштәре, студенттары араһында ҙур хөрмәт ҡаҙанған кеше.
– 1997 – 2002 йылдарҙа Сибай институтында белем алдым, – ти уның уҡыусыларының береһе Рәйлә Мәһәҙиева. – Хәлиҙә Барый ҡыҙын талапсанлығы, ярҙамсыллығы, алсаҡлығы өсөн бик ныҡ ихтирам итәм. Кәңәш һорап, һәр саҡ уға килә инем. Иң кәрәк саҡтарҙа алтын һүҙҙәрен табып, тормошома ыңғай йүнәлеш биргән остазыма сикһеҙ рәхмәтлемен.
Хәлиҙә Нурғәлина белем биргән студенттарҙың күбеһе бөгөн юғары вазифа биләй, хеҙмәтен яратып башҡара. Төрлө илдәрҙә эшләгәндәр ҙә байтаҡ. Уларҙың сит телдәрҙе яҡшы белеүе, иркен аралашыуы хаҡында ишетеү – тотош институт өсөн ҙур шатлыҡ.
– Беҙҙең уҡыу йорто сит илдәрҙең мәғариф учреждениелары менән тығыҙ хеҙмәттәшлек итә. Уларҙың профессорҙары беҙгә килеп лекциялар уҡый, осрашыуҙар уҙғара. Йәштәргә ошондай аралашыу, тимәк, үҫеш мөмкинлеге биргән етәкселеккә, атап әйткәндә, институттың директоры Зиннур Йәрмөхәмәтовҡа ҙур рәхмәтлебеҙ. Алдынғы юғары уҡыу йортонда эшләүем менән бәхетлемен, – ти Хәлиҙә Нурғәлина.
Институт уҡытыусылары йәштәргә бөгөнгө баҙар шарттарында бер нисә сит тел белеү зарурлығы хаҡында әйтә килә. Иҡтисад, хоҡуҡ буйынса уҡыған студенттар ҙа махсус программаға ярашлы Америкала, Ҡытайҙа, Һиндостанда эшләп, инглиз теленән белемен даими камиллаштыра. Бында, әлбиттә, эшен мөкиббән яратҡан, уҡытыу методикаһын яҡшы белгән, һәр саҡ яңылыҡҡа ынтылған Хәлиҙә Барый ҡыҙының тос өлөшө бар. Сит телдәрҙе өйрәнеүгә бәйле һөҙөмтәле алымдар эҙләүгә, студенттарҙың белемен арттырыуға йүнәлтелгән хеҙмәттәргә ваҡытын йәлләмәй ул. Уның уҡыусыларының курс һәм диплом эштәре заман талаптарына ярашлы бай йөкмәткеһе, фәнни йәһәттән төплө, яңылыҡлы булыуы менән айырылып тора.
Х. Нурғәлина Сибай педагогия колледжы менән дә тығыҙ хеҙмәттәшлек итә. Ундағы уҡытыусыларға, студенттарға методик ярҙам күрһәтә, осрашыуҙар уҙғара, курс, диплом эштәренә рецензия яҙа. Колледж уҡыусыларын шулай алдан уҡ үҙ ҡанаты аҫтына алып, уларҙы институтҡа уҡырға йәлеп итә.
Дандың төбө – хөрмәт, хөрмәттеке – хеҙмәт, ти халҡыбыҙ. Ошо хәҡиҡәткә тоғролоғо менән күптәргә өлгө күрһәтеп йәшәгән Хәлиҙә Барый ҡыҙына артабан да тик уңыштар насип булһын.