“Гүзәл тәрбиә биреү – бөтмәй торған мираҫ ул. Дөрөҫ тәрбиә юҡ икән, балаларға донъя тулы алтын ҡалһа ла, файҙаһы булмаҫ. Тәрбиәһеҙлектәре – бәхетһеҙлектер, уның өҫтөнә мираҫ итеп ҡалған алтындар икенсе бәхетһеҙлек булыр”, – тигән билдәле мәғрифәтсе Ризаитдин Фәхретдин. Район үҙәгендә урынлашҡан Балалар ижады үҙәгендә меңгә яҡын уҡыусы шөғөлләнә. Мәғариф учреждениеһының төп маҡсаты – малай һәм ҡыҙҙарға матур тәрбиә биреү, төрлө яҡлап уларҙың һәләтен үҫтереү.
Ижад үҙәге бейеү, вокал, театр сәнғәте, музыка ҡоралдары, экология, биология, туризм һәм тыуған яҡты өйрәнеү, социаль-педагогик йүнәлеш буйынса уңышлы эшләп килә. Балалар ойошмаһы эшмәкәрлегенең сифаты учреждениеның 2013/14 уҡыу йылындағы уңыштарынан күренә. Үҙәк директоры Кәүсәр Сәйетов – үҙе күп яҡлы талант эйәһе: ҡурайсы, бейеүсе, йырсы... Етәксеһе сәнғәтте үҙ иткәнгә күрә, балаларҙың да уңыштары ҡыуандыра. “Нур”, “Ҡолонсаҡ” театр, “Йондоҙсоҡтар” бейеү, “Яңғыҙ йыр”, “Илһам” коллективтары районда үткән сараларҙы үҙ сығыштары менән биҙәй. Нефтекама ҡалаһында “Яҙғы тамсылар” республика конкурсында Вилнур Фазылов, Данис Латипов, Элина Алиева, Илнар Ғилметдинов, Линар Ғилмиханов, Алина Ҡаҙраева, Линара Зарипова конкурс лауреаттары һәм дипломанттары булһа, Айбулат Ғиләжетдинов Гран-при яуланы. Ул шулай уҡ “Оҙон көй-2013” йыр бәйгеһендә Рәсәйҙең бөтә төбәктәренән килгән 110 ҡатнашыусы араһында өсөнсө урынды алды, “Сулпылар” республика телевизион конкурсында ҡатнашып, финалға сыҡты.
“Нур” театр коллективы, Раевка ауылында үткән “Башҡортостан ынйылары” республика конкурсында сығыш яһап, “Иң яҡшы сәхнә композицияһы” номинацияһында дипломант булды. Коллектив ағзалары Данияр Баһуманов менән Мәрйәм Шафиҡова “Сәхнә өмөтө” йүнәлешендә Маҡтау ҡағыҙы менән бүләкләнде.
В. Ғөзәйерова етәкселегендәге тыуған яҡты өйрәнеү һәм туризм түңәрәге ағзалары “Башҡортостан – ҡурсаулыҡтар иле” республика викторинаһында ҡатнашты. Дүрт уҡыусы беренсе урынды алды, икәүһе лауреат булды. Дамир Ғөзәйеров, Алһыу Йосопова, Азат Ситдиҡов “Ватан юлынан” республика тикшеренеү бәйгеһендә финалға сыҡты, һәр береһе үҙ номинацияһында лауреат исемен алды. Тырыш педагог уҡыусылары менән Башҡортостанды арҡырыға-буй йөрөп сыҡҡан. Күгәрсен районындағы Мораҙым мәмерйәһенә лә сәйәхәт ҡылғандар, киләсәктә Арҡайымға барырға йыйыналар.
Мәғариф системаһының иң әһәмиәтле йүнәлештәренең береһе – балаларға экологик белем биреү. Үҙәктә ошо йәһәттән даими рәүештә олимпиадалар, слет-конкурстар үткәрелә. Бында шулай уҡ балаларға эстетик тәрбиә биреүгә ҙур иғтибар бүленә. Педагог А. Мостафина етәкселегендәге художество-керамика түңәрәге ағзаһы Алина Шәрифуллина үҫмерҙәр араһында үткәрелгән “Ҡышҡы әкиәт” Бөтә Рәсәй бәйгеһендә “Минең эштәрем” номинацияһында икенсе урынды алды. Шул уҡ конкурста педагог үҙе “Оҫталыҡ дәресе” проекты өсөн “Үҙем менән таныштырыу” номинацияһында икенсе урынды яуланы.
Йыл дауамында үҙәктә “Тәбиғәт көҙгөһө” конкурс-күргәҙмәһе, “Балалар күҙе менән йәшел йыһан”, “Эко-объектив” исемле фоторепортаждар бәйгеһе, “Кешеләр яҙмышы һәм урман тормошо” тигән әҙәби конкурс ойошторола. Район хакимиәте һәм мәғариф бүлеге ҡарары буйынса “Бала саҡ карабы” тигән өр-яңы ярыш булдырылды, ул ике көнгә иҫәпләнгән.
Өҫтәмә белем биреү учреждениеһында шөғөлләнгән балалар, файҙалы һөнәрҙәргә өйрәнеп, һәләттәрен үҫтерер һәм киләсәктә уларҙы тормошта ҡулланыр тигән ышаныста ҡалайыҡ. Ижад үҙәгендә күңелле ығы-зығы бер ҡасан да тынмаһын.