Бөгөнгө мәктәп китапханаһы уҡыу залы ғына түгел, ә заманса техника менән йыһазландырылған, дәр менән йәнәш атлаған шаулы, мауыҡтырғыс, бай һәм үҙенсәлекле донъя ул. Унда байрамдар, викториналар, күргәҙмәләр уҙғарыла, балалар дәрескә, олимпиадаларға әҙерләнә, төрлө яҡлап камиллаша.
Фатима Мостафина исемендәге 20-се Өфө ҡала башҡорт гимназияһы китапханаһы – тап шундай рухи мөйөш. Унда балалар ғына түгел, уҡытыусылар менән ата-әсә лә йыш була. Эштең оҫта ойошторолоуы, һис шикһеҙ, ике тиҫтә йылдан ашыу ғүмерен китапханаға бағышлаған мөдир Разия Ғәйнуллинаның тәжрибәһенә бәйле. 
Ағымдағы уҡыу йылы башынан алып бында байтаҡ сара уҙҙы. Күптән түгел Башҡортостандың халыҡ шағиры Мостай Кәримдең тыуыуына 95 йыл тулыу айҡанлы үткәрелгән викториналар айырыуса йәнле, фәһемле, мауыҡтырғыс булды. Мәҫәлән, IV “Б” класы уҡыусылары үҙҙәре яратып уҡыған “Беҙҙең өйҙөң йәме” повесы буйынса көс һынашты. Балалар әҫәрҙең йөкмәткеһен яҡшы белә, әҙиптең йәш быуынға ни әйтергә теләгәнен аныҡ төшөнгән. Класс етәксеһе Гөлнара Салауат ҡыҙы әйтеүенсә, улар викторинаға етди әҙерләнгән, Мостай Кәримдең ижадын яратып өйрәнә.