Республикабыҙҙа юл төҙөлөшө комплексын үҫтереүгә Әбйәлил юл ремонтлау-төҙөү идаралығы лайыҡлы өлөш индерә. Идаралыҡ үҙ ҡарамағындағы дөйөм ҡулланылыштағы 625 километр юлды йыл әйләнәһенә тәрбиәләп тота, төҙөкләндерә һәм яңыларын һала. Йылдан-йыл башҡарылған эш күләме арта бара: 2011 йылда 120 миллион һумлыҡ эш башҡарылһа, быйыл 280 миллион һумға етте. Һигеҙ айҙа 225 миллион һум үҙләштерелгән дә инде.
Быйыл ғорурланып телгә алырлыҡ эштәр бихисап. Әлмөхәмәт — Сибай юлында Төйәләҫ ауылы участкаһында туғыҙ километр юлға асфальт йәйелде. Бында Салауат Хәлитовтың бригадаһы уңғанлыҡ күрһәтте. Ул 25 йылдан ашыу идаралыҡта эшләй һәм был төҙөлөштөң нескәлектәрен белә. Сентябрҙә Ишҡол – Хәлил йүнәлешендә дүрт километр юл сафҡа инде.
Былтырғы һыу баҫыу эҙемтәләрен бөтөрөү, күперҙәрҙе нығытыу өсөн өр-яңы бригада төҙөлгәйне. Мәхмүт, Йәнгел, Елембәт ауылдарындағы ҡоролмалар тиҙ арала файҙаланыуға тапшырылды.
Идаралыҡ етәксеһе Ринат Лотфулла улы Аҡсурин хеҙмәт юлын тап ошонда башлай, оҙаҡ йылдар баш инженер вазифаһында хеҙмәт итә. Бер нисә йыл Әбйәлил район хакимиәте башлығы урынбаҫары вазифаһын биләй, төбәктең төҙөлөш, сәнәғәт мәсьәләләрен хәл итеүҙә ҡатнаша. Шулай ҙа юл төҙөлөшө – уның өсөн иң яҡыны, тормош мәктәбе. Шуға ла ул быйыл ошонда етәксе булырға ризалыҡ белдерҙе. Әйткәндәй, идаралыҡҡа оҙаҡ йылдар Башҡортостандың атҡаҙанған төҙөүсеһе Мирхәт Рәжәпов етәкселек иткәйне. Хәҙер ул “Башкиравтодор” асыҡ акционерҙар йәмғиәтенең генераль директор урынбаҫары вазифаһын башҡара.
Һәр коллектив алдынғы эшселәре менән көслө. Юл мастерҙары Ә. Низамов, И. Әхтәмов, Б. Шөгөров, Л. Собханғолов кеүек тәжрибәле һөнәр эйәләре менән бергә бригадирҙар Н. Ихсанов, Й. Әхтәмов, И. Вәлиев фиҙакәр хеҙмәт өлгөһө күрһәтә. Асфальт етештереүҙә мастер Р. Хәмзин, бригадир Т. Баймөхәмәтов етәкселегендә оператор М. Кирәев, онтаусы М. Шаһивәлиев, И. Мостафин һәм башҡалар ҙур тырышлыҡ күрһәтә.
Әбйәлил юл төҙөүселәре берҙәм һәм дәртле. Район, республика күләмендәге мәҙәни, спорт бәйгеләрендә улар һәр саҡ алдынғы. Быйыл, мәҫәлән, Мәҙәниәт йылына арналған “Таланттар төбәге – Әбйәлил” халыҡ ижады фестивалендә үҙешмәкәр коллективтарының Гран-при яулауы юҡҡа түгел. Тармаҡ хеҙмәтсәндәренең республика спартакиадаһында ла коллектив спортсылары алдынғылыҡты бирмәне. 
Хеҙмәткәрҙәр социаль яҡтан да оло хәстәрлек менән солғап алынған. Улар йылы аш менән тәьмин ителә. Балалар ялы ойошторола. Өлкәндәргә “Асы” шифаханаһына юллама тәҡдим ителә. Йәш ғаиләләргә йорт һалғанда транспорт, төҙөлөш материалдары менән ярҙам итеү ҡаралған. Ветерандар ҙа онотолмай. Ҡыҫҡаһы, Әбйәлил юл ремонтлау-төҙөү идаралығындағы юғары күрһәткестәр фиҙакәр хеҙмәт менән яулана. Иң мөһиме – уларҙың эш һөҙөмтәһенә ҡарап: “Әбйәлил юлдары бит ул!” – тип рәхмәт тойғоһо менән үтә юлаусылар.