Стәрлетамаҡтағы инвалидтар эштәре буйынса координация советының сираттағы ултырышында мөмкинлектәре сикләнгән кешеләрҙең һаулығын хәстәрләү, көнкүреш шарттарын яҡшыртыу һәм буш ваҡыттарын ойоштороу мәсьәләһе хаҡында һүҙ барҙы.
Бөгөн ҡаланың медицина ойошмаларында 18 меңдән ашыу инвалид иҫәптә тора. Шуларҙың 1107-һе – балалар. Ғөмүмән, мөмкинлектәре сикләнгән граждандар ҡала халҡының 6,6 процентын тәшкил итә. Хәйер, уларҙың һаны күпме генә булмаһын, һәммәһе лә беҙҙең иғтибарға мохтаж. Әлеге ултырышта ла инвалидтарға ҡарата мөнәсәбәтте яҡшыртыуға төп баҫым яһалды.
Һаулыҡ һаҡлау йәһәтенән ҡалала шаҡтай ғына эш башҡарыла. Мәҫәлән, быйыл инвалид балаларҙың бөтәһе лә медицина күҙәтеүе үткән, күптәре дауаланған. 209 бала “Нур” шифаханаһында һаулығын нығытҡан. Хәҙерге медицина ҡаҙаныштары сабый донъяға тыумаҫ борон уның зәғифме-түгелме икәнлеген асыҡларға ярҙам итә. Стәрлетамаҡта ла был йәһәттән етди эш алып барыла. Шуныһы ҡыуаныслы: бөгөн йөрәге ауырыу сабыйҙарҙың сирҙән ҡотолоу әмәле бар, әммә барлыҡ осраҡта ла түгел шул…
Быйыл өлкәндәрҙең 68 проценты медицина тикшеренеүе үткән. Йылдың тәүге яртыһында 786 инвалид тейешле дауа алған. 12 баланың һәм 78 бәлиғ йәштәге граждандың инвалид статусынан арыныуы ла һөйөнөслө.
Инвалидтарҙы дарыуҙар менән тәьмин итеү хаҡында ла һүҙ барҙы сарала. Был йәһәттән дә алға китеш бар. Тик бүленгән 600 һумға күпме генә дарыу алып була һуң? Бынан тыш, кәрәкле дарыуҙарға заказ биреү буйынса ла етешһеҙлектәр баштан ашҡан. Мәҫәлән, 2015 йылдың тәүге кварталында кәрәк буласаҡ дарыуға быйыл июлдә үк заказ бирелгән. Ә йылдың икенсе яртыһында социаль ярҙамға мохтаждар һаны артмаҫ, тип кем әйтә ала?
Стәрлетамаҡта инвалидтар өсөн уҙғарылған сараларҙы, спорт секцияларын һанап бөтөрлөк түгел. Әммә әлегә ярҙамға мохтаждар яғынан әүҙемлек күҙәтелмәй. Ғәмәлдә байрамдарҙы буш залдар өсөн үткәргән һымаҡ килеп сыға. Инвалидтар өсөн уңайлы шарттар тыуҙырыу буйынса муниципаль программалар төҙөгән саҡта тәҡдимдәр ҙә бик аҙ булған. Ултырышта ҡатнашыусылар белдереүенсә, сәбәпте инвалидтарҙан ғына эҙләү дөрөҫ түгел. Тимәк, үҙебеҙ улар менән аҙ аралашабыҙ, проблемаларын һаман да өйрәнеп бөтмәйбеҙ.
Эйе, яҙмыш тарафынан ҡыйырһытылған был кешеләргә, ысынлап та, иғтибар аҙ. Юҡһа, ҡайһы бер биналар алдындағы пандустарҙың ныҡ текә, уңайһыҙ булыуын, инеү өсөн шарттарҙы яҡшыртыу урынына ҡыңғырау ғына ҡуйыуҙарын нисек аңлатырға? Тик шуныһы үкенесле: эш штрафҡа килеп терәлгәс кенә, күптәр хатаһын аңлай. Инвалидтарға: “Һеҙ яңғыҙ түгел!” — тип ҡабатларға яратһаҡ та, ғәмәлдә ул башҡасараҡ килеп сыға. Әлбиттә, бер кәңәшмәлә генә бөтә проблемаларҙы хәл итеү мөмкин түгел. Шулай ҙа “боҙ”ҙоң тиҙерәк ҡуҙғалырына өмөт бар.