Башҡортостанда “500 ферма” айырым маҡсатлы республика программаһына ярашлы объекттарҙы сафҡа индереү дауам итә. Дүртөйлө районында өс һөтсөлөк фермаһы файҙаланыуға тапшырылды.
Ленин исемендәге тоҡомсолоҡ заводында капиталь ремонттан һуң 140 баш танаға иҫәпләнгән бина, Еникеев исемендәге йәмғиәттә, шулай уҡ “Шишмә” тоҡомсолоҡ заводында һыйыр аҙбарҙары асылды.
Әйткәндәй, әле программаға ярашлы 140 ферма яңыртыла, 202 малсылыҡ бинаһында эш тамамланған, 34 силос-сенаж ҡоролмаһы төҙөлгән. Проект тормошҡа ашырыла башлаған мәлдән алып республика ҡаҙнаһынан 1,2 миллиард һумлыҡ дәүләт ярҙамы күрһәтелгән.