“Танып” шифаханаһына тәүгә килеүебеҙ түгел. Тәбиғәттең хозурлығы кешеләрҙең ихласлығы менән киҫешкән ергә ҡабат-ҡабат сәфәр ҡылғы килә. Был аңлашыла ла: күңел матурлыҡҡа, сафлыҡҡа, инсафлыҡҡа тартыла. Өҫтәүенә бында сәләмәтлегеңә лә иғтибар ҙур — тәнде лә, йәнде лә дауалайҙар, ҡыҫҡаһы. Был юлы шифаханаға эшлекле сәфәр менән генә килгәйнек, шуға унда ял итеүселәргә бер аҙ көнләшеп тә ҡайтып киттек. Уның ҡарауы, “Танып”ты үҙебеҙ өсөн тағы ла нығыраҡ астыҡ — сәләмәтлек, дуҫлыҡ, мәрхәмәтлек мәккәһе икән ул.
Йән, тән ял иткән ерҙә“Танып”тың эшләй башлауына киләһе йыл ун йыл тула. Шифахана өсөн был, бәлки, әллә ни ҙур ҙа арауыҡ түгелдер, әммә республикала ғына түгел, Рәсәй, хатта донъя кимәлендә абруй ҡаҙана барған “Танып” өсөн — ҙур башланғыс. Минераль сығанаҡтар базаһында барлыҡҡа килгән башҡа бик күп шифаханалар кеүек үк, “Танып”тың да үҙ тарихы бар. Аҡһаҡалдар бәйән итеүенсә, Башҡортостандың төньяғындағы изге шишмә элек-электән шифалы булыуы менән билдәле, “бик күп ауырыуҙан дауа”, тиелә риүәйәттәрҙә лә. “Ошо шишмәнең һыуы менән битен йыуған һуҡырҙарҙың күҙҙәре асылған, яуҙа яраланған батырҙар аяҡҡа баҫҡан, шишмәнән ауыҙ иткәндәр ҡартаймаған, оло йәштә лә сәләмәтлегенә зарланмаған”. Бәлки, кемдер быларҙы саманан тыш арттырыу тип уйлар, әммә күңел ял иткән ерҙә һаулығың да нығыныр, кәйефең дә шәп, эштәрең дә уң булыр. Быға, әлбиттә, тәбиғәт тә, “Танып” шифаханаһы хеҙмәткәрҙәре лә булышлыҡ итә. Әйтәйек, яңыраҡ бында минераль һыу сығарыу цехы асылған. Изге шишмәнән ҡойолған “Танып” һыуын “Полушка” сауҙа селтәре магазиндарында табырға мөмкин.
Өкөгә эш етерлек“Танып”ҡа килеп төшөү менән беҙҙе өкө ҡаршы алды. Эйе-эйе, өкө. Шифахана хакимиәте ял итергә килгәндәрҙең барыһын да шулай өкө кейемендә ҡаршы алыуҙы ойошторған икән. Йыраҡ юлдан килгәс, бер аҙ йонсотоп та кителгәйне, әммә ҡолас йәйеп ҡаршы сыҡҡан был “йән эйәһен” күргәс, күңел күтәрелде. “Хужа” һәр ҡайһыбыҙ менән ихлас иҫәнләште, яҡын туғанын күргәндәй ҡосаҡлап уҡ алды. Өфө ҡунаҡтарына ғына шундай иғтибарҙыр тип уйлай күрмәгеҙ берүк. Ул — һәр ял итеүсенең тоғро дуҫы, кәрәк икән кәңәшсеһе, ярҙамсыһы. Иң мөһиме — өкөгә эш етерлек, сөнки “Танып”тан йыл дауамында кеше өҙөлмәй.
Ял итеүселәр килеү менән мотлаҡ рәүештә тәжрибәле табиптарҙа консультация үтә. Теләйһең икән — терапевҡа, теләйһең икән педиатрға мөрәжәғәт ит. Физиотерапевт, дерматовенеролог, гинеколог, хирург, стоматолог, уролог та һеҙҙең ҡарамаҡта. Дарыухана ла бар. Ә дауалауға килгәндә, “Танып” тулыһынса заманса ҡорамалдар менән йыһазландырылған. Бальнеотерапия, дауалау массажы, заманса аппараттарҙа физиотерапия, лаборатор диагностика, механотерапия, SPA-капсулалар, сауна — барыһы ла ял итеүселәр өсөн. Шифаханала дауалау алымдарының ғына түгел, йылы һүҙҙең дә ҡөҙрәтенә, көсөнә ышанаһың. “Танып”та шул тиклем ихлас, алсаҡ хеҙмәткәрҙәр эшләй. Һәр ҡайһыһы хәлеңә инер, ярҙам ҡулы һуҙыр. Улар тураһында әллә күпме яҙырға мөмкин, әммә шуны ғына өҫтәр инем: бында тәжрибә һәм йәшлек камил үҫешә.
— Татыу, берҙәм коллектив — уңыш-ҡаҙаныштарҙың төп билдәһе. Беҙҙә тәжрибәле, үҙ эшен яратҡан хеҙмәткәрҙәр тупланған. Бөтә башланғыстарыбыҙҙың халыҡ өсөн эшләнгәнен аңлайбыҙ, шуға бурыстарыбыҙ ҙа, маҡсаттарыбыҙ ҙа, киләсәккә пландарыбыҙ ҙа тәү сиратта яуаплылыҡҡа ҡайтып ҡала, — ти “Танып” шифаханаһы директоры Кашшаф Ямалетдинов.
Яуаплылыҡ тигәндәй, шифахана етәкселеге бер байрамды ла иғтибарһыҙ ҡалдырмай. Айырыуса Оло йәштәгеләр көнө юғары кимәлдә ойошторола бында. Асҡын, Ҡариҙел, Мишкә, Балтас, Борай, Тәтешле, Яңауыл райондарынан саҡырылған әбей-бабайҙар был көндө шифаханала ял итә. Улар өсөн экскурсиялар, байрам табыны, концерт программалыры ойошторола. Ҡорбан байрамында иһә шартына тура килтереп ҡорбан салыу, оло йәштәгеләрҙе, балаларҙы ҡорбан ашы менән һыйлау ҙа — шифахананың матур йолаһы.
Барыһы ла халыҡ өсөн
“Танып” шифаханаһы буйлап атлайбыҙ. Ҙур, яҡты, бөхтә бүлмәләр. Ял итеүселәр өсөн китапхана, бильярд, тренажер залдары, өҫтәл теннисы, мини-гольф, мунса, сауна эшләй. Теләйһең икән, прокатҡа спорт ҡоролмаларын алып торорға мөмкин. Кистәрен төрлө күңел асыу программалары ҡаралған. Уйын-көлкө, конкурстарҙы, билдәле шәхестәр менән осрашыуҙарҙы, үҙешмәкәр артистарҙың сығыштарын ял итеүселәр һәр саҡ көтөп ала. Асҡын районының иҫтәлекле урындарына ойошторолған экскурсиялар ҙа йылы хәтирәләр ҡалдыра. Ғөмүмән, шифаханала кеше рәхәтләнеп ял итһен, һаулығын нығытһын өсөн барыһы ла бар. Бының өсөн етәкселек көсөн дә, ваҡытын да йәлләмәй. “Барыһы ла халыҡ өсөн”, — ти улар бер тауыштан.
Әткәндәй, “Танып”ты хәҙер республикала ғына түгел, Рәсәйҙә, хатта донъяла ла таныйҙар.
— Беҙҙең шифаханала Сахалиндан алып Калининградҡа тиклем төрлө төбәктән, хатта Германиянан килеп ял итәләр, — ти Кашшаф Сәйфит улы, ғорурланып.
Ғорурланырлыҡ та шул. Әгәр хеҙмәтең танылһа, тырышлығың баһаланһа, иң мөһиме – халыҡ араһында абруйың булһа, ниңә ғорурланмаҫҡа, ти?!
Еңеүҙәрҙең нигеҙе — тырышлыҡта
Киләһе йылда “Танып”тың асылыуына 10 йыл туласағы хаҡында үрҙә әйтеп үткәйнек инде. Әммә шифахананың эшмәкәрлеге менән яҡындан танышҡан һайын был дата ҡабат-ҡабат үҙенә арбаны. Ун йыл. Ошо ваҡыт эсендә “Танып” ни тиклем бейеклектәргә өлгәшкән... Һис һүҙһеҙ, төп күрһәткес — ойоштороу кимәле, беҙҙеңсә. Шифахананы тәүге көндәрҙән үк дөрөҫ йүнәлештә көйләгән етәксе булмаһа, һәр башланғысты алдан тоҫмаллап, айыҡ аҡыл менән баһалаған директор тәғәйенләнмәһә, һине ярты һүҙҙән, хатта ҡарашыңдан аңлаған татыу, берҙәм коллектив тупланмаһа, был тиклем ҡаҙаныштарға өлгәшеүе, ай-һай, мөмкин дә булмаҫ ине. Һоҡланыуыбыҙҙы Кашшаф Сәйфит улынан да йәшермәнек. Башҡалар ҙа белһен, күрһен, өйрәнһен өсөн генә уңыш серен етәксенең үҙенән дә һораныҡ.
— Ун йыл. Ошо ҡыҫҡа ғына ваҡыт эсендә республиканы ғына түгел, ил, донъя киңлектәрен яулауы ҡыйын булманымы?
— Мин бер ваҡытта ла ауырлыҡтарҙан ҡурҡманым. Киреһенсә, уларҙы һынау кеүек ҡабул итергә күнеккәнмен. Һынауҙы лайыҡлы үтәм икән, тимәк, тырышлығым юҡҡа булмаған. Ә һөҙөмтәләргә килгәндә, һәр ҡаҙаныш, һәр еңеү бөртөкләп йыйылған алтынға бәрәбәр. Береһе лә еңел бирелмәне. Йоҡоһоҙ төндәр, халыҡ, коллектив алдында яуаплылыҡ, тәүәккәллек һәм, иң мөһиме, хеҙмәткәрҙәреңә ышаныс... Әйткәндәй, коллективымдан уңдым. Бындай “тыл” булғанда эшләүе лә рәхәт, еңел.
— Тимәк, бөтәһе лә тырышлыҡҡа ҡайтып ҡала.
— Әлбиттә. Тик ултырып ҡына үрҙәр яулап булмай.
Йәштәргә үрнәк булһын
“Танып” тураһында яҙғанда, йәштәргә үрнәк булһын тигән теләктән, шифахананың врач-урологы Урал Мөрсәлимов хаҡында ла бер-ике һүҙ әйтмәй булдыра алмайым. Баймаҡ районының Мәмбәт ауылы егете ул. Башҡорт дәүләт медицина университетын тамамлау менән ошонда эш башлаған. Һөнәре буйынса хирург.
— Диплом алғас, Өфөлә ҡалыу уйы менән янманым. Маҡсатым нисек тә күңелгә ятҡан эш урыны табыу ине. Хыялым тормошҡа ашты, — ти егет кеше баҫалҡы ғына.
— Эш башлап китеүе ҡурҡытманымы һуң?
— Юҡ, остаздарым яҡшы булды.
Бөгөн Урал ике бала атаһы. Ҡатыны менән Айбулат, Камилә исемле ул һәм ҡыҙ үҫтерә.
— Торлаҡ мәсьәләһен нисек хәл иттегеҙ? — тип һорайбыҙ Уралдан.
— Шифахана етәкселеге был йәһәттән хәстәрлек күреп ҡуйғайны инде. Ҡасабала хеҙмәткәрҙәр өсөн өйҙәр төҙөлгән. Эш башлау менән асҡысын да тапшырҙылар, — егеттең яуабында үҙе, ғаиләһе өсөн шатлыҡ та, етәкселәренә рәхмәт тә сағылды.
“Танып” тураһында тағы әллә күпме яҙырға булыр ине. Әммә йөҙ тапҡыр ишеткәнсе, бер тапҡыр барып күр тигәндәй, һеҙ ҙә Асҡын яҡтарына барып әйләнегеҙ, дуҫтар! Үкенмәҫһегеҙ. “Танып”тан булмай туйып!