...Ваҡыт тәгәрмәсе алға елә. Иле­беҙҙәге һәр ауыл кеүек үк, Иҫке Сытырман да тарих һынауҙарын байтаҡ кисерә. Шуға ҡарамаҫтан, уның халҡы элеккеләй ғорур, берҙәм йә­шәй, тырышып эшләй, күмәкләп осрашып алырға ла ваҡыт таба.
Мәҫәлән, күптән түгел ойош­торол­ған сара, йәғни Солтанғоловтар нә­ҫеленең шәжәрә байрамы ла ҙур ойошҡанлыҡ менән үтте. Алдан урамдар таҙартылды, һәр кем йорт-ихатаһын йүнәтте. Солтан­ғоловтар өҫтәүенә үҙ иҫәбенә мәҙәниәт йортона косметик ремонт яһаны. Һөҙөм­тәлә былай ҙа ҡупшы, йыйнаҡ ауыл тағы ла йәшәреп киткәндәй, яңы һулыш алған­дай булды.
Мәҙәниәт йортона йәше лә, ҡарты ла дәррәү йыйылды. Йәмле Ашҡаҙар буйын хәтерләткән сәхнәнән “Тамыр” телеканалы режиссеры Ләйсән Сол­танғолова балалар менән бергә Юрматы ырыуы тарихы ха­ҡын­да бәйән итте.
Фойела нәҫел оҫталарының ҡул эштәренән йәрминкә ойошторолдо. Ҡунаҡтарҙы айырыуса хөр­мәтле ағинәйе­беҙ Фирҙәүес Сол­­танғолова­ның ейәнсәре Наҙ­гөл Яйҡа­рова төшөргән ауыл күренештәре һоҡлан­дырҙы. Мортаза Солтанғоловтың ҡортсолоҡта ҡулла­ныу өсөн яһалған ағас әйберҙәре, нәҫеленә бәйле фото­һүрәттәре янынан да халыҡ өҙөлмәне.
Һәләттәргә бай быуындың иң ҡә­ҙерле ҡомартҡыһы – иҫке төрки телендә яҙылған шәжәрә – элекке мәктәп директоры Мос­тафа Сол­танғоловта һаҡлана. Уның улы Венер халыҡҡа төп тарихи мәғлүмәтте еткерҙе.
Иҫке Сытырманда йәшәгән Сол­тан­ғолов­тарҙың һигеҙ ғаиләһе лә үҙ шәжәрәһе менән таныштырҙы, концерт күрһәтте. Юбилейҙарын билдә­ләгәндәр, яңы ғаилә ҡорғандар, яңы тыуған сабыйҙар өсөн ҡотлау һүҙ­ҙәре, изге теләктәр яңғыраны.
Мәктәптең 1974 йылғы сығарылыш класс уҡыусылары остаздары Мос­тафа Солтанғоловҡа мәртәбәле юбилейы һәм ҡатыны Зәйтүнә апай менән 60 йыл бергә ғүмер и­теүҙәре айҡанлы үҙенсәлекле ҡотлау әҙер­ләгәйне. Нәҫелдең иң өлкән кешеһе Сәлимә Солтанғолованың баш­ҡорт халыҡ йыры “Сәлимәкәй”ҙе башҡа­рыуы ла ғәжәп үҙенсәлекле, тул­­­­ҡын­­­ландырғыс булды. Шуныһы ла иғти­барға лайыҡ: “Һылыуҡай” республика конкурсында төрлө йылдарҙа еңеү яулаған Ләйсән, Раушания һәм Зөлфиә лә тап ошо Солтан­ғолов­тарҙың ҡотло нәҫеленән бит.