Башҡортостан Хөкүмәте йортонда хеҙмәт алдынғыларына дәүләт наградалары тапшырыу тантанаһы үтте. Башҡортостан Президенты Хакимиәте етәксеһе Сергей Молчанов һәр бүләкләнеүсенең ҡулын ҡыҫып, ихлас тәбрикләне. Башҡортостан башлығы Рөстәм Хәмитовтың ҡотлау һүҙҙәрен еткерҙе.
– Башҡортостан Рәсәйҙең башҡа субъекттары араһында һәр яҡлап алдынғылар рәтендә килә. Был – беҙҙең бергәләп ең һыҙғанып эшләү һөҙөмтәһе. Залда ултырған һәр кем төбәгебеҙҙең яҡты киләсәге өсөн хеҙмәт итә, – тип мөрәжәғәт итте Сергей Молчанов залда ултырғандарға.
Бүләкләнгәндәр араһында таныш йөҙҙәр бихисап. Мәҫәлән, мөләйем генә йылмайған Асия Ғәйнуллина – гәзитебеҙҙең күптәнге тоғро дуҫы. Уға “Башҡортостандың атҡаҙанған мәҙәниәт хеҙмәткәре” тигән маҡтаулы исем бирелде.
“Башҡортостандың атҡаҙанған врачы” исеме алған “Толпар” шифаханаһының педиатры Айгөл Сәйетова менән Ғ. Ҡыуатов исемендәге Республика клиник дауаханаһының урология бүлеге мөдире Алексей Пушкарев медицинаның алға китешен, яңы йыһаздар, яңы ҡорамалдар менән тәьмин итеү юғары кимәлдә ойошторолоуын билдәләп үтте. Шулай уҡ иң-иңдәр араһында гәзитебеҙҙең тоғро дуҫы – “Регионстрой” яуаплылығы сикләнгән йәмғиәтенең генераль директоры Мөнир Рәхмәтуллин да бар.
– Беҙҙең ойошма республика буйынса төҙөлөш эштәрен әүҙем йәйелдереп ебәрҙе. Торлаҡ йорттар ҙа, балалар баҡсалары ла, дауаханалар ҙа, административ биналар ҙа һалабыҙ. Эшләгән кешегә эш ҡарышмай ул! – тип һүҙен ҡыҫҡа тотто етәксе.
Тантанала “БашРЭС” һәм “Д. Черняев исемендәге Урал-Себер нефть үткәргес торбалар магистрале” ойошмаларының алдынғы хеҙмәткәрҙәренә Башҡортостан Республикаһының Почет грамоталары тапшырылды.