Алдан хәбәр итеүебеҙсә, Өфөнөң Салауат Юлаев проспектындағы яңы мәсет урынлашҡан биләмәлә “Мөслим-сити” тигән хеҙмәт һәм ял үҙәге төҙөлөргә тейеш ине. Был проект тормошҡа ашырыла башланы ла инде.
Башҡортостан мосолмандарының Диниә назаратынан хәбәр итеүҙәренсә, Салауат Юлаев – Минһажев – Коммунистик – Бехтерев урамдары киҫелешкән биләмәнән 20 гектар майҙанлыҡ ер бүленеп, төҙөлөшкә рөхсәт алынған. Әҙерлек эштәре йыл ярым эсендә тамамланырға тейеш.
“Мөслим-сити” үҙәгендә хакимиәт-офис биналары комплексы, ҡунаҡхана, апарт-отель, кафе, ресторан, сауҙа рәттәре, ғаилә менән ял итеү урындары, парк асыу планлаштырылған. Улар барыһы ла Ислам ҡанундары буйынса эшләйәсәк.
Биләмәгә Покров сиркәүе лә инә. Уның менән яңы мәсетте дуҫлыҡ аллеяһы тоташтырасаҡ.