Бөгөлмә-Бәләбәй ҡалҡыулығына юл тоттоҡ. Урман-ҡырҙар алтынға мансылған күңелле мәл. Ҡайҙалыр яландар бушап ҡалған, ә икенсе урында баҫыуҙар һабантуйҙы хәтерләтә. Ниһайәт, Рә йылғаһына ла килеп еттек. Тимәк, беҙ – Йәрмәкәй районында.
Райондың ауыл хужалығы идаралығының баш агрономы Салауат Миңнуллиндан ураҡ барышы, ҡышҡа әҙерлек тураһында һорашабыҙ.
– Көндәрҙең аяҙ тороуы беҙҙең өсөн тик яҡшыға ғына, – ти Салауат Мөҡәддәс улы. – Иген культураларын юғалтыуһыҙ йыйып, бураларға ташыуға һәр кем намыҫ менән ҡарай. Шул уҡ ваҡытта кукурузды силосҡа сабыу, һалам өйөү ҙә планға ярашлы бара. Ошо көндәрҙә сөгөлдөр ҡаҙыуға тотондоҡ.
Баш агроном менән Ырымбур өлкәһенә терәлеп ятҡан Түбәнге Ҡарамалы ауылына юл тоттоҡ. Ыҡ йылғаһы сик ролен үтәй. Нәҡ ошо урында беҙҙе уйсан, етди ҡарашлы бер ағай ҡаршы алды – райондағы алдынғы “Ҡарамалы” хужалығының етәксеһе икән.
– Ергә мөмкин тиклем һаҡсыл ҡараш булдырырға тырышабыҙ, – тип башланы һүҙен рәйес Фәнил Шәйҙуллин. – Ер эшкәртеү технологияһы боҙолдо икән, тимәк, һин күпте юғалттың тигән һүҙ. Ә уны яңынан тергеҙеүгә бихисап көс һәм ваҡыт талап ителә. Хужалыҡ йыл да 1800 гектар тирәһе майҙанға иген культуралары сәсә, күләмде кәметмәй. Бөгөн бойҙайҙың гектар ҡеүәте 22 центнер тәшкил итә икән, был күрһәткескә һөйөнөргә генә кәрәк. Иге-сиге күренмәгән баҫыуға һоҡланыуымды күреп, Фәнил Мөзаһит улы һүҙен дауам итте:
– Автопаркты даими яңыртып тороу ҙа мул уңышҡа булышлыҡ итә. Әйтәйек, ике-өс йыл арауығында ғына 10 миллион һумлыҡ техника һатып алдыҡ. Ике “Т-150”, “Беларусь” тракторы, йәнә “Нива” комбайны, шулай уҡ бер нисә тағылма ҡоролма. Был эште киләсәктә лә дауам итәсәкбеҙ.Кәйефтәрен белеү маҡсатында егеттәр янына ашыҡтыҡ. Илфат Кашапов белдереүенсә, тәпәй баҫҡан ерҙән дә ғәзиз урын юҡ, бүтән яҡҡа китеп эшләүҙе күҙ алдына ла килтерә алмай.
Уның һүҙҙәренә Вилдан Насибуллин ҡушылды:– Эш хаҡы ваҡытында бирелә, беҙҙең өсөн иң мөһиме ошо. Хатта дәртләндереү саралары ла ҡаралған. Ауылдың артабанғы киләсәге хужалыҡтың эшмәкәрлеге менән туранан-тура бәйләнгән.
Ғөмүмән, “Ҡарамалы” йәмғиәте етәкселеге алға ҡарап йәшәй. Машина-трактор оҫтаханаһы биләмәһендә иген һаҡлау өсөн тәғәйенләнгән бынамын тигән келәттәре бар. Әммә рәйес бының менән генә сикләнергә уйламай.
Фәнил Шәйҙуллин хеҙмәткәрҙәре тураһында ла тик йылы һүҙҙәр әйтте – Ринат Мәзитов, Илсур Ғатауллин, Олег Ванюшин һәм башҡа механизаторҙарҙы маҡтап телгә алды.