Ата-әсәнең күбеһе балаларының янында булыуын теләй. Ә сыбар ҙур ауыҙ был йәһәттән хаттин аштырып ебәрә: яралғыларын ауыҙында йөрөтә.
Балыҡ шулай тоҡомон йыртҡыстарҙан һаҡлай. Селбәрәләр барлыҡҡа килгәс, уларҙы аҙым һайын ҡурҡыныс һағалай, әммә ҡасып ҡотолоу өсөн йөҙгөстәре көслө була. Ә ыуылдырыҡ быға һәләтле түгел. Шуға күрә инә балыҡ ыуылдырыҡ һалғас, атаһы уларҙы аталандыра ла ауыҙына йыя. Биш-ете көндән селбәрә барлыҡҡа килә лә үҙаллы йөҙөп китә.
Ҙур ауыҙҙар үҙҙәре ҡаҙған өңдә йәшәй, вертикаль торошта йөҙөп, бөтә ғүмерен шул тирәлә уҙғара. Атлантик һәм Һинд океандарында, Тымыҡ океандың Үҙәк Америка янындағы ярында күпләп үрсейҙәр.