Башҡортостан Президенты вазифаһын ваҡытлыса баш­ҡарыусы Рөстәм Хәмитов бындай мөһим сарала ҡатнаш­ҡа­ны өсөн “Кредит гарантиялары агентлығы” банкка ҡарамаған депозит-кредит ойошмаһы” асыҡ акционерҙар йәмғиәте идараһы рәйесе Галина Изотоваға оло рәхмәтен белдерҙе.
– Инвестиция йәлеп итеү өсөн беҙҙә уңайлы шарттар тыуҙырылды, был киләсәктә лә шулай дауам ителәсәк, – тине Рөстәм Зәки улы. – Инвестиция инфраструктураһын булдырыу – республикабыҙ өсөн ҙур мәртәбә. Ә инде инвес­тиция фонды төҙөүҙең кәрәклеге тураһында әйтеп тораһы ла түгел.
Рөстәм Хәмитов билдәләүенсә, Башҡортостанда илебеҙ­ҙә тәүгеләрҙән Эшҡыуарҙарҙың хоҡуҡтары буйынса вәкил тәғәйенләнде. Әйткәндәй, республика башлығы вәкил Рафаил Ғибәҙуллиндың эшен бик юғары баһаланы.
Башҡортостан Хөкүмәте менән “Кредит гарантиялары агентлығы” банкка ҡарамаған депозит-кредит ойошмаһы” асыҡ акционерҙар йәмғиәте араһында хеҙмәттәшлек тураһында килешеүгә ҡул ҡуйылды.
Галина Изотова әйтеүенсә, быйыл май айында ғына ойошторолоуына ҡарамаҫтан, йәмғиәттең абруйы көндән-көн үҫә. Эшҡыуарҙарға уның ярҙамы ифрат ҙур. Ошондай структура Япония һәм Францияла бик уңышлы эшләй.
Башҡортостандағы индустриаль парк һәм технопарктар тураһында Башҡортостан Хөкүмәте Премьер-министры урынбаҫары Дмитрий Шаронов һөйләне.