“Аллаһ Тәғәлә башҡаларға ҡарата мәрхәмәтле булмаған кешеләрҙең гонаһтарын ярлыҡамай”, – тигән пәйғәмбәребеҙ Мөхәммәт ғәләйһис-сәләм үҙенең мөбәрәк хәҙисендә.
Шәфҡәтлелек әҙәм балаһына фани донъяла ла, ахирәттә лә изгелектәр генә биреп тора, рәхимһеҙлек иһә Аллаһтың иғтибарынан сикләй. Ә кеше Раббыбыҙҙың рәхмәтенә һәр ваҡыт мохтаж. Ҡыҙғанысҡа ҡаршы, күптәр быны ауырлыҡтар килгәндә генә иҫенә төшөрә.
“Мәрхәмәт-шәфҡәт ике төрлө була, – тип өйрәтә Ислам. – Тәүгеһе тыумыштан килә, Аллаһтың рәхмәте һәм әсә һөтө аша күңелгә һеңдерелә. Бындай сифатҡа эйә әҙәм балаһы һәр ваҡыт кемгәлер яҡшылыҡ күрһәтеп, файҙалы булып йәшәргә тырыша. Киң күңеллелеге өсөн Хаҡ Тәғәлә уның башҡарып өлгөрмәгән ғәмәлдәренә лә әжерен бирә.
Мәрхәмәт-шәфҡәт тәрбиә аша ла һалына. Әҙәм балаһы был һыҙаттың өҫтөнлөгөн белеп, файҙаһын күреп үҫә, яҡшы кешеләр менән аралашып йәшәй, нәфсе ҡотҡоһона ҡаршы торорға өйрәнә. Ғәмәлдәрҙең башҡалар риза булырлығын ғына башҡарырға тырыша. Ошолай Аллаһтың рәхмәтенә лайыҡ була”.