Сарала Өфөнө 2021 йылда ХI Бөтә донъя уйындарын үткәреү хоҡуғына дәғүә иткән ҡала сифатында күрһәтеү мөмкинлеге тикшерелде. Виталий Мутко билдәләүенсә, Рәсәйҙә спорттың Олимпияға ҡарамаған төрҙәре комитеты ойошторолдо һәм киләсәктә дәүләт кимәлендә ошо спорт төрҙәренә булышлыҡ итеү бурысы ҡуйыла. Министр Башҡортостанды илебеҙҙә спортты үҫ­тереү флагмандарының береһе тип атаны.
Рөстәм Хәмитов, Башҡортостан Бөтә донъя уйындарын ҡабул итергә теләй, төбәк халҡының 80 проценттан ашыуы ошо фекерҙе хуплай, тип билдәләне.
– Беҙҙә объекттарҙың әҙерлеге юғары ки­мәлдә. Халыҡ-ара спорт сараларын үткәреү йә­һәтенән дә тәжрибәбеҙ ҙур, — тине ул. — Киләһе ете йылда күләмле эш башҡарырға һәм Бөтә донъя уйындарын юғары кимәлдә ойош­торорға әҙербеҙ. Ошо сара аша илебеҙҙә эле­герәк аҙ билдәле спорт төрҙәрен танытырға, һөнәри һәм күмәк спорт даирәһен киңәйтергә теләйбеҙ. Заявка кампанияһында еңеүгә иҫәп тотабыҙ, әл­биттә.
Хосе Перурена үҙ сиратында сараны үткәреү хоҡуғына бәйгенең башланыуын белдерҙе. Өфөнән тыш, Уйындарҙы үткәреүгә Перуның баш ҡалаһы Лима һәм Американың Алабама шта­тындағы Бирмингем дәғүә итә.


***
Мәскәүҙә Рөстәм Хәмитов Бөтә Рәсәй авиация материалдары ғилми-тикшеренеү институтының тәжрибә майҙансыҡтарын һәм етештереү цехтарын ҡараны.

Төбәк башлығы институттың эшмәкәрлеге менән танышҡас, генераль директор Евгений Каблов менән предприятие һәм республика Хөкүмәте араһындағы хеҙмәттәшлек мөмкин­лектә­рен тикшерҙе. Атап әйткәндә, Рөстәм Хә­митов институттағы ғилми-тикшеренеү һәм фән­ни-етештереү комплекстары, заманса ирет­мә­ләр һыналған лабораториялар, ҡатмарлы де­талдәр эшләү технологияһы, сифатҡа контроль системаһы менән танышты.
Институт илебеҙҙәге байтаҡ авиация пред­приятиеһы менән хеҙмәттәшлек итә, Өфө мо­торҙар эшләү берекмәһе менән дә берлектәге проекттарҙы тормошҡа ашыра.