Һауа шарттарының көйһөҙлөгө мал аҙығы әҙерләүгә, урып йыйыу эштәренә күпмелер ҡамасаулаһа ла, ауыл халҡы һәр мәлде файҙаланырға тырыша. Ана бит, бер үк райондың ҡайһылыр баҫыуҙарында һыҙат булып ямғыр яуып үтте, ә “Авангард”, “Салауат” яуаплылығы сикләнгән йәмғиәттәре яландары трактор, комбайн тауыштарына күмелгән.
— Тәүге айҙарҙа ҡоролоҡ та булған тимәҫһең, — ти “Авангард” директоры Рәмил Ибраһимов. — Ужым культураларынан төшөм мул ғына килә. Бигерәк тә арыш уңышы шатландыра.
Рәмил хужалыҡты дүрт йыл етәкләй. Уға тиклем атаһы Рәшит ағай уны аяҡҡа ныҡлы баҫтырған. Һуңғы йылдарҙа элекке “Первомайск” совхозының “Южный” бүлексәһен дә ҡушҡандар. Шулай итеп, һөрөнтө ерҙәр һигеҙ мең ярым гектар булып киткән. Бөгөн бар техника ла етә. Уларҙы хеҙмәтләндереү, тотҡарлыҡһыҙ эшләү өсөн баш инженер Олег Укронов етәкселегендә айырым бригада төҙөлгән. Иртә яҙҙан уҡ механизаторҙарға, көтөүселәргә көнөнә ике тапҡыр йылы аш ойошторолған. Райондың ауыл хужалығы идаралығы начальнигы Владимир Александров әйтеүенсә, барлыҡ хужалыҡтар ҙа урып йыйыу эшенә дәррәү тотонған. Бөгөнгө көндә ужым культураларының 30 проценты һуғылһа, гектар көсө уртаса 29 центнер тәшкил итә икән.
— Дымлылыҡ әлегә юғары — 18-23 процент. Шулай ҙа уҙған йылғы хаталарҙы ҡабатламаҫҡа тырышабыҙ. Дымлылыҡтың түбәнәйеүен көтөп тормаҫтан, быйыл туранан-тура ла, яҫмаларға һалып та һуғабыҙ. Беҙҙең һәр хужалыҡта тиерлек иген елләтеү урындары бар. Киптергестәр эшләй. Мәҫәлән, “Дружба”ла яңы иген таҙартҡыс, киптергес төҙөлдө, “Салауат”та ла шундай уҡ эштәр бара. Бөгөн баҫыуҙарҙы 135 комбайн иңләй. Ошолай эшләһәк, алдағы аҙналарҙа ужым культураларын алып бөтөрбөҙ, тим. Шулай уҡ быйыл 21 мең 970 гектарҙа яңыһын сәсергә планлаштырабыҙ...
“Салауат” хужалығы баҫыуҙарында ла эш гөрләй. Бигерәк тә ырҙын табағында мәж киләләр: машиналарҙың ҡайһыһы иген таҙартҡыс аҫтынан сыға, ҡайһыһы ашлыҡ килтерә. Ырҙын табағы мөдире Илдар Шәриповҡа ла, иген таҙартҡыс, киптергес машиналарын хеҙмәтләндереүсе механиктар Артур Асҡаров, Наил Ғәлиевтәргә лә мәшәҡәт етерлек. Фиҙаил Туҡаевтың техникаһы машиналарға өҙлөкһөҙ иген тейәп оҙатып тора. Әйткәндәй, бында ике сменала эшләйҙәр. Настя Сәйфуллина, Әлфиә Аҙнаева, Флүзә Саидова ырҙын табағына килгән машиналарҙы бушатышып ҡына ҡалмай, майҙансыҡты һепереү, таҙартыу ҙа уларҙың иңендә.
— Арыш гектарынан 28-30 центнер бирә. Һуңғы ямғырҙар игенде тулыштырырға ныҡ ярҙам итте. Улар булмаһа, яна инек. Бәрәңге иһә тулыһынса яһалма һуғарыла. Ике һыу һурғыс станцияһы бар. Теләгән урынға торбалар һуҙып, күсереп була, — ти баш агроном Радик Асҡаров.
Баҫыуға караптарын йүнәлтеүсе “капитандар”ҙы атамаһаҡ яҙыҡ булыр. Хужалыҡта биш комбайн эшләй. Тимәк, үҫтерелгән барлыҡ уңышты йыйып алыу Миҙхәт Ғималов, Фәнзил Сабитов, Радик Ғиззәтуллин, Флүр Сәйфетдинов, Раил Мусаҡаев иңендә.
Йәмғиәт етәксеһе Рөстәм Баһауетдинов хеҙмәткәрҙәренән ҡәнәғәт. Әйткәндәй, “Авангард” хужалығы директоры Рәмил Ибраһимовтың атаһы һымаҡ уҡ, уның атаһы Рәис Ғөбәйҙулла улы ла ҡасандыр хужалыҡты аяҡҡа баҫтырған кеше. Социалистик Хеҙмәт Геройы! Күсәгилешлек булып, баҙар теҙгенен ышаныслы ҡулдар тотҡанда эш тә бара, уңыш та һөйөндөрә шул.