Киләһе йылда беҙҙә ШОС һәм БРИКС саммиттары үтәсәге күптән билдәле инде. Был яуаплы сараларға Өфөлә әҙерлек нисек бара? Ниндәй мөһим төҙөлөштәр башҡарыла? Яңы ҡунаҡханалар, мөһим социаль объекттар ваҡытында сафҡа инерме? Ошо һәм башҡа һорауҙарға матбуғат конференцияһында Өфө ҡалаһы хакимиәте башлығының беренсе урынбаҫары Александр Филиппов яуап бирҙе. Журналистар менән йәнле аралашыу ғәҙәттәгесә йылы кабинетта түгел, ә яңы ғына төҙөлгән 15 ҡатлы йорттоң түбәһендә үтте.
– Бөгөн Өфө төҙөлөш буйынса күтәрелеш осорон кисерә, – тип белдерҙе Александр Анатольевич. – Ошо йыл эсендә генә 890 мең квадрат метр торлаҡ сафҡа инәсәк, шуның 120 мең квадрат метры социаль программаны хәл итеүгә йүнәлтелгән. Әле баш ҡалабыҙҙағы 550 объектта төҙөлөш барыуын иҫәпкә алғанда, был маҡсатты тормошҡа ашырыу әллә ни ҡыйынға тура килмәҫ.Александр Филиппов белдереүенсә, ШОС һәм БРИКС саммиттарына ҡарата Өфөлә һигеҙ ҡунаҡхана төҙөлә, быйыл шуларҙың алтауһын сафҡа индереү күҙаллана. Бынан тыш, баш ҡалала ике өр-яңы балалар баҡсаһы, бер нисә сауҙа үҙәге, капиталь ремонттан һуң мәктәптәр ишеген асасаҡ.
– Халыҡ өсөн йәшәргә уңайлы шарттар булдырыу – төп маҡсатыбыҙ, – тип белдерҙе баш ҡала хакимиәте башлығының беренсе урынбаҫары.
Өфөнөң үҙ йөҙөн булдырыуҙы ла төп йүнәлештәрҙең береһе тип билдәләй урындағы етәкселек. Бының өсөн тәү сиратта төҙөлөш өлкәһендәге мөһим проблемаларҙы хәл итергә кәрәк.
– Бер нисә йыл элек төҙөлөш өсөн ерҙе компаниялар төрлө ысул менән алған. Быға әллә ни ҡаты талаптар ҙа ҡуйылмаған. Һөҙөмтәлә ҙур сығымдар кисергән компания торлаҡтың хаҡын арттырырға мәжбүр булған. Әле хәл үҙгәрҙе. Был мәсьәләне республика етәксеһе иғтибар үҙәгендә тота, – тине Александр Филиппов.
Ҡала хакимиәте барлыҡ төҙөлөш эштәрен тикшереп тора, сөнки сығымдарҙы кәметеү маҡсатында вайымһыҙлыҡ күрһәткән компаниялар ҙа юҡ түгел. Йә йорттоң тышҡы ҡиәфәте матур түгел, йә тирә-яғы төҙөкләндерелмәгән. Ундай илке-һалҡы төҙөүселәргә йортто сафҡа индерергә рөхсәт бирелмәй. Әлеге көндә Өфөлә бындай биш объекттың етешһеҙлеген бөтөрөргә ҡушылған.