Башҡортостан Президенты вазифаһын ваҡытлыса башҡарыусы Рөстәм Хәмитов үткәргән Хөкүмәт кәңәшмәһендә республикала йәшәүселәрҙең шәхси торлаҡ төҙөлөшө өсөн ер участкаларын бушлай алыуға хоҡуҡтарын күҙәтеү, 2015 – 2019 йылдарҙа төбәктә электр энергетикаһының үҫеше һәм дәүләт, муниципаль һатып алыуҙар өлкәһенә контракт системаһын индереүҙең тәүге һөҙөмтәләре кеүек мөһим мәсьәләләр ҡаралды.
Беренсе ярты йыллыҡта республикала 1 миллион квадрат метрҙан ашыу торлаҡ сафҡа индерелгән. Был, былтырғы күрһәткестәр менән сағыштырғанда, 8 процентҡа күберәк. Һөҙөмтәлә Башҡортостан торлаҡ йорттарҙы, шулай уҡ һәр кешегә торлаҡты файҙаланыуға тапшырыу буйынса Волга буйы федераль округында икенсе урынды биләй.
– Яңы торлаҡтың иң ҙур күләме шәхси төҙөүселәргә тура килә. Беҙҙә йорт һалыу өсөн бер тапҡыр һәм бушлай ер участкаһы алыу хоҡуғына эйә граждандар категорияһы исемлеге закон йәһәтенән нығытылған. Бөгөн ошондай льготаға эйә булғандарға (яҡынса 52 мең кеше) 22 меңдән ашыу участка бирелде, – тине Рөстәм Зәки улы.
Ул электр энергетикаһына ҡағылышлы мәсьәләләр хаҡында ла һөйләне.
– Энергия селтәрҙәренә тоташтырыу шарттарын яҡшыртыу, уны мөмкин тиклем тиҙерәк атҡарыу, үтә күренмәлерәк һәм аҙ сығымлыраҡ итеү кәрәк. Бөгөн республиканың Сәнәғәт һәм инновация сәйәсәте министрлығы 100 меңдән ашыу кеше йәшәгән ҡалаларҙа ҡулланыусыларҙы ҡеүәте 150 киловатт булған электр селтәрҙәренә технологик тоташтырыу ваҡытын ҡыҫҡартыу һәм ябайлаштырыу буйынса эш алып бара. Ә ниңә ҙур ҡалаларҙа ғына? Бәләкәй эшҡыуарлыҡтың үҫеше, яңы эш урындары булдырыу һөҙөмтәһендә иҡтисады ҡайнап торорға тейешле бәләкәй ҡалалар, район үҙәктәре лә бар бит әле беҙҙә. Был мәсьәләне тиҙ хәл итергә кәрәк, – тине Рөстәм Зәки улы.
Уның әйтеүенсә, федераль талаптарға ярашлы, энергияны ҡабул итеүсе ҡоролмаларға тоташтырыу өсөн һуңғы сик быйылға – 162, киләһе йылға 45 көн алынған. Былтырғы йыл һөҙөмтәләренә ҡарағанда, республикала тоташтырыу ваҡыты ике тапҡырға күберәк – уртаса 250 көн тәшкил иткән!
– Оятһыҙлыҡ! Быны нисек аңларға? Ундай һүлпәнлек өсөн кем яуап бирә? Федераль талаптарға яуап бирә алмайбыҙ. Беҙ уларҙы үтәргә генә түгел, арттырып үтәргә тейешлебеҙ. Кешеләр электр селтәрҙәренә тоташтырыу өсөн йылдар буйы йөрөй. Был – тәртипһеҙлек! – тип ризаһыҙлыҡ белдерҙе Рөстәм Хәмитов.
Быйыл 1 ғинуарҙан «Дәүләт һәм муниципаль ихтыяждарҙы тәьмин итеү өсөн тауарҙарҙы, эштәрҙе, хеҙмәттәрҙе һатып алыу өлкәһендәге контракт системаһы тураһында» 44-се Федераль закон көсөнә ингәйне.
– Закон төбәктәргә электрон сауҙалашыу һөҙөмтәһендә тауарҙарҙы, эштәрҙе һәм хеҙмәттәрҙе һатып алыу исемлегенә өҫтәмәләр индереү мөмкинлеген бирҙе, – тине үҙ сығышында Рөстәм Зәки улы.
Ул шулай уҡ министрлыҡтар, ведомстволар эшмәкәрлеген планлаштырғанда контракт системаһының дәүләт идара итеүендә мөһим инструмент буласағын белдерҙе.
Кәңәшмәлә республиканың ер һәм мөлкәт мөнәсәбәттәре министры Евгений Гурьев, сәнәғәт һәм инновация сәйәсәте министры Алексей Карпухин, Дәүләт заказдарын урынлаштырыу буйынса дәүләт комитеты рәйесе Сергей Новиков та сығыш яһаны.