Граждандар һуғышы осоронда Башҡорт хөкүмәте баш­лығы Әхмәтзәки Вәлидиҙең фекерҙәше һәм көрәштәше Тәҡиулла Алиев төбәктең азатлығы өсөн йәнен аямай һу­ғыша, башҡорт ғәскәрҙәренең Ҡыҙыл Армия яғына сығыуын ойоштороусыларҙың береһе була. Башҡорт­остан Үҙәк Баш­ҡарма комитеты ҡуйған бурысты үтәп, ул Петроградты Антантанан һәм Юденичтан һаҡлауға ғәскәр мобилизациялай.
Конференция программаһына ярашлы, был көндө Екатеринбургтағы “Алиев урындары” буйлап экскурсия булды. Сараны Свердловск өлкәһенең башҡорт үҙәге ойошторҙо.





Өлкә Хөкүмәте һәм Башҡортостан вәкилдәрен йыр-бейеү, милли аш-һыу менән ҡаршыланылар. Башҡорт­тарҙың йыйынында Силәбе губернаторы урынбаҫары Николай Сандаков, өлкәнең мәҙәниәт министры Алексей Бетехин, Башҡортостан Республикаһының Дәүләт Йыйылышы – Ҡоролтай Рәйесе урынбаҫары Йома­бикә Ильясова, Башҡортостан­дың Силәбе өлкәһендәге вәкиле Амур Хәби­бул­лин, Ҡурған һәм Силәбе өлкәләре мөфтөйө Ринат Раев, Свердловск өлкәһенең Башҡорт үҙәге етәксеһе Фәймә Йосопова һәм башҡалар ҡатнашты.
Николай Сандаков конференция делегаттарына өлкә губернаторының сәләмен тапшырып, Көньяҡ Уралдағы иң әүҙем йәмәғәт ойошмаһына башҡорт телен, үҙенсәлекле мәҙәниәтте һаҡлауға һәм үҫтереүгә, милләт-ара татыу­лыҡты нығытыуға ҙур өлөш индергән өсөн рәхмәт белдерҙе. Дәүләт Йыйылышы – Ҡоролтай Рәйесе урынбаҫары Йомабикә Ильясова сарала ҡатнашыусыларҙы ихлас тәбрикләне һәм ойошманың иң әүҙем ағзаларына Башҡортостан Мәҙәниәт министрлы­ғының рәхмәт хаттарын тапшырҙы.
Конференцияла ойошманың яңы редакциялағы уставы ҡабул ителде. Өлкә башҡорттары ҡоролтайы башҡарма комитеты рәйесенең отчет доклады ҡәнәғәтләнерлек тип табылды. Морис Йосопов ойошманың яңы рәйесе итеп раҫланды, шулай уҡ башҡарма комитеттың, контроль-ревизия комиссияһының яңы составы һайланды, резолюция ҡабул ителде. Йыйында, дөйөм алғанда, 200-ҙән ашыу делегат һәм абруйлы ҡунаҡтар ҡатнашты. Сараның аҙағында Стәрлетамаҡ театр-концерт берекмәһе артистарының концерты булды.