...Оло йәштәгеләргә күп кәрәкме ни?! “Яңауыл” тимер юл вокзалында тынлы оркестр менән тантаналы ҡаршы алыу, көндөң болотло, йонсоу булыуына ҡа­ра­­­маҫ­тан, ҡунаҡтарҙың күңе­лен һиҙе­лерлек күтәреп ебәрҙе. Улар, хужалар менән ихлас күрешеп, хәл-әхүәл һорашты. Вокзал алдында тимер юлсылар хөрмәтенә ҡуйылған тарихи паровоз янында фотоға төшкәндән һуң, ҡунаҡтар тарих-тыуған яҡты өйрәнеү му­зейында булды. Бында уларҙы Яңа­уыл районы хакимиәте баш­лығы Илшат Вәзи­ғәтов йылы тәбрикләне, ра­йондың тарихы һәм бөгөнгө хәле менән ҡыҫҡаса таныштырҙы.
Нефтекамалағы музейҙа, библио­үҙәк­­тә булыу ҙа вете­рандарҙың ҡыҙыҡ­һыныуын арттырҙы. Компьютер тех­­но­ло­­гия­­ла­ры үҙләштерелгән “Өсөн­сө быуын университеты” эшенең яҡшы ойошторолғанын барыһы ла билдәләп үтте. Ике төбәктең ветеран ойошмалары етәксе­ләре Еңеү скверын­дағы Мәңге­лек ут монументына сәскә һалды, илебеҙ азатлығы өсөн һәләк булған­дарҙы бер минутҡа тын ҡалып иҫкә алды.
Кәңәшмәнең икенсе кө­нөн­дәге пленар ултырыш та бик йөкмәткеле булды. Баш­ҡорт­остандың хеҙмәт һәм халыҡты социаль яҡлау министры Ленара Иванова ветерандар тура­һында хәс­тәр­лек­тең сағыу миҫа­лы булараҡ рес­­пуб­­ликала 2011 йылдан тормошҡа ашы­рылған “Өсөнсө быуын университеты” һәм “Социаль туризм” программалары ту­ра­һында ентекле һөйләне. Был саралар өлкән­дәрҙе үҙ донъя­һында ғына сикләнеп йәшәүҙән арындыра, төрлө яҡлы мөмкин­лектәрен тор­мошҡа ашырырға булышлыҡ итә. Ошо өс йыл эсендә 52 мең пенсионер компьютер серҙәрен өй­рәнһә, 12 меңдән ашыу ветеран арза­ныраҡ хаҡҡа туристик путевка алған.
Нефтекама ҡалаһы хакимиә­те баш­лығы Рәшит Дәүләтов, ике төбәктең ветерандар советы рәйестәре Марат Мулла­­ғәлләмов менән Юрий Судаков һәм башҡалар ветерандарҙы торлаҡ менән тәьмин итеү, улар­ҙы дауалау һәм һауыҡтырыу, йәш быуынды тәр­биә­ләүҙә өлкән­дәрҙең лайыҡлы өлөшө тураһында һөйләне.
Еңеүҙең 70 йыллығы айҡан­лы үт­кәре­ләсәк саралар, әлбиттә, ҡорҙа ҡат­нашыу­сылар­ҙың иғтибар үҙәгендә бул­ды. Вете­ран ойошмаларының төрлө кимәл­дәге етәкселәре билдә­ләүенсә, һөйләшеү барыһы өсөн дә бик файҙалы. Кәңәш­мәлә ҡатнашыусылар Башҡорт­остан­да һәм Свердловск өлкә­һендә йәшәүселәргә мөрәжәғәт ҡабул итте һәм төрлө кимәл­дәге власть органдарын, йәмәғәт­селекте, тәү сиратта йәштәрҙе Бөйөк Еңеүҙең 70 йыллығын лайыҡлы ҡаршылау өсөн бар тырыш­лыҡты һалырға саҡырҙы.
Бөтөн илгә билдәле Нефтекама автозаводына ойош­торол­ған экскурсия­ла, Крас­нокама районы үҙәге Ни­ко­ло-Бере­зовка ауылындағы Никола ҡорамында булғандан һуң ветеран ойошмалары етәкселәре, аралашыуҙан дәрт һәм дарман алып, яңы йүнәлештәр асыҡлап, үҙ төбәк­тәренә юлланды.