Иглиндә “500 ферма” программаһы буйынса семинар-кәңәшмә булды.
Бөгөн үҙебеҙҙә етештерелгән ауыл хужалығы продукцияһын арттырыу хаҡында һүҙ алып барғанда программаның әһәмиәте баһалап бөткөһөҙ. 2012 – 2016 йылдарға тәғәйенләнгән был йүнәлеш – малсылыҡтың һөт етештереү тармағын үҫтереү йәһәтенән ҙур этәргес көс. Программала ҡатнашырға теләүселәрҙең йыл һайын арта барыуы ла шул хаҡта һөйләй.
Кәңәшмәгә 11 райондың ауыл хужалығы идаралығы етәкселәре, ғалимдар, ҡорамал һәм техника һатыу, кредит биреү менән шөғөлләнгән ойошма вәкилдәре килгәйне.
Ауыл хужалығы министры урынбаҫары Фларис Шәйхетдинов билдәләүенсә, программа эшләй башлағандан бирле уға 177 һөтсөлөк фермаһы, тоҡомсолоҡ эше буйынса бер предприятие ингән. Быйыл конкурста ҡатнашыуға 41 хужалыҡ 56 ферманы яңыртыуға документ тәҡдим иткән, шуларҙың 41-е хәҙер ошо статусҡа эйә.
Программа талаптарына бер ни ҡәҙәр үҙгәрештәр индерелгән. Хәҙер “500 ферма”ға документтар тапшырыу өсөн һыйыр малының 200 баш булыуы етә. Фларис Шәйхетдинов теге йәки был ойошманан ҡорамалдар алғанда һаҡ булырға саҡырҙы. Юғиһә ҡиммәт хаҡҡа килтерелгән аппараттар ҡайһы саҡ ҙур бәлә тыуҙыра.
Кәңәшмәлә шулай уҡ төҙөлөш һәм кредит биреү ойошмалары үҙҙәренең шарттары менән таныштырҙы, фән әһелдәре иһә сифатлы һөт алыу, мал тәрбиәләү шарттары хаҡында файҙалы лекция уҡыны.
Кәңәшмәлә ҡатнашыусылар һуңынан “Мәсәғүтов” крәҫтиән (фермер) хужалығының һөтсөлөк фермаһы менән танышты. Ойошманың етәксеһе Альберт Мәсәғүтов ҡунаҡтарға үҙенең эшмәкәрлеге хаҡында һөйләне.
Күптәр, ялтлап торған яҡты бинаны күреп, өнһөҙ ҡалды. Ысынлап та, ике йыл элек бында хеҙмәткәрҙәр тубыҡтан бысраҡ кисеп йөрөһә, бөгөн ул танымаҫлыҡ булып үҙгәргән. Ферма тулыһынса заман шарттарына яраҡлаштырып эшләнгән, һөт үткәргестәр менән йыһазландырылған. Малсылар өсөн ял итеү бүлмәһе, душ бар. Һөттө ҡаптарға тултырыу өсөн мини-завод эшләй. Әле төкәтмә яһайҙар. Киләсәктә унда һөт ризыҡтары етештереләсәк.
Бөгөн хужалыҡта бер мең баш самаһы һыйыр малы бар. Һуңғы йылдарҙа һөт, ит етештереү өс ярым тапҡырға артҡан. Ойошма үҙен орлоҡ, мал аҙығы менән тулыһынса тәьмин итә, машина-трактор паркын яңырта.
Белемле кадрҙарҙы йәлеп итеү йәһәтенән дә етди хәстәрлек күрелә. Әле улар өсөн торлаҡ төҙөлә. Малсыларҙың, механизаторҙарҙың эш хаҡы һәйбәт, бесән бирелә.
Иглин районы хакимиәте башлығы урынбаҫары Вил Хафизов “500 ферма” программаһының районда малсылыҡты үҫтереү өсөн уңайлы шарттар тыуҙырыуы хаҡында һөйләне, бүтәндәрҙе лә уға әүҙем ҡушылырға саҡырҙы.