Бөгөн баҙар иҡтисады шарттарына яраҡлашып, үҙ эшен булдырғандар һаны арта. Айырыуса ауылдарҙа эшһеҙлек арҡаһында йәки лайыҡлы эш хаҡы түләнгәнен таба алмаған йәштәр, тәүәккәлләп, үҙ юлын һайлай. Сыңғыҙ ауылынан Ураҙбаевтар ғаиләһе – тап шундай йүнселдәрҙән.
Нияз Ураҙбаев эшҡыуарлыҡҡа 2006 йылда килә. Үҙ эшен булдырып, таҡта ярыу цехы асып ебәрә. Ошонда эшҡыуарлыҡ нигеҙҙәрен өйрәнә, бизнес алып барыуҙың нескәлектәренә төшөнә, ҡыҫҡаһы, был тәңгәлдә тәүге сынығыу ала. Тора-бара йәш эшҡыуар ауыл хужалығы тармағында үҙен һынап ҡарарға теләй. Тормош талабы үҙенекен итә: матур итеп донъя ҡорам, ғаиләмде ҡарайым тигән кеше, алма беш – ауыҙыма төш, тип ята алмай.
– 2010 йылда пай ерҙәрен арендаға алып, 70 гектарҙа иген сәстем. Әлбиттә, еңелдән булманы. Айырыуса тәүге йылдарҙа. Яйлап эштәр алға барған кеүек, тик көтөлгән уңыш кеше хеҙмәтенән генә тормай, уға һауа шарттары ла йоғонто яһай. Быйыл, мәҫәлән, 140 гектарҙа иген һәм техник культуралар сәстем. Бынан тыш, былтыр 40 гектар майҙанда күп йыллыҡ үләндәр сәсеп ҡалдырҙым – әле шунда бесәнгә төштөк, – ти Нияз Рәжәп улы.
Тәүәккәл эшҡыуар 2012 йылда “Ғаилә һөтсөлөк фермаһы” дәүләт программаһына инә. Ауыл эргәһендә майҙаны 410 квадрат метр тәшкил иткән ферма төҙөй. Яйлап мал һанын арттыра. Һыйыр малын һатып алыуға киткән сығымдарҙың яҡынса 40 проценты субсидия аша эшҡыуарға кире ҡайтарыла. Бөгөн ғаилә фермаһында 57 баш һыйыр малы иҫәпләнә, шуның 31-е – һауын һыйыры. Нияз Ураҙбаев эш урындары булдырған. Фермала бер һауынсы, бер быҙау ҡараусы һәм ике малсы тир түгә. Тағы миҙгелле эштәргә ваҡытлыса эшселәр йәлеп ителә.
Ғаилә һөтсөлөк фермаһында көндәлек тулайым һауым уртаса 300 килограмм тәшкил итә, шуның 260-ы “Мәләүез-һөт” яуаплылығы сикләнгән йәмғиәтенең “Баймаҡ-һөт” филиалына тапшырыла.
Ауыл хужалығында техникаһыҙ бер аҙым алға китеп булмай. Шәхси эшҡыуарҙың хужалығында бөгөн бер “ДТ-75”, ике “МТЗ-82.1” тракторы, “КамАЗ”, төрлө агрегаттар бар. Былтыр бер “Беларус”ты тағылмалы урғысы менән бер миллион һумға һатып ала. Быға Хөкүмәт тарафынан субсидия бирелгән.
Киләсәктә малсылыҡ, игенселек тармаҡтарын киңәйтеү, иген һаҡлау өсөн махсус келәттәр төҙөү пландары менән йәшәгән ныҡышмал эшҡыуарҙың ныҡлы тылы – ғаиләһе бар. Тормош юлдашы Зәлиә Ҡорбанғәле ҡыҙы ҡағыҙ эшен, бухгалтерияны алып бара. Йәштәр Арыҫлан исемле ул менән Эльвина исемле ҡыҙ тәрбиәләй.
Ауылда ошондай ғаиләләрҙе күреп, күңел һөйөнә. Аҡса табам, тип ярты ғүмерен сит яҡта уҙғарыуға ҡарағанда, йәнтөйәгендә күңеленә ятҡан шөғөл табып, башҡаларға эш урыны булдырып йәшәгән йәштәр тик маҡтауға лайыҡ. Аяғына ныҡлы баҫырға ынтылған эшҡыуарға күтәрелеп китһен, эше уңһын тип теләргә генә ҡала.