Ошо көндәрҙә баш ҡалала Илья Климовҡа ҡарата суд хөкөмө иғлан ителде. Былтыр ноябрҙә ул, иҫерек килеш рулгә ултырып, Өфөнөң Киров һәм Цюрупа урамдары киҫелешендә кеше тапатҡайны. Видеокамералар теркәгән яҙманан күренеүенсә, Климов юл сатында туҡтарға маташмаған да. Ҙур тиҙлектә елгән автомобиль үткәүел буйлап вайымһыҙ ғына атлаған ҡатынды осортоп алып китеп, ҡаршы һыҙатта туҡтаған автобустың алғы тәҙрәһенә ҡуша бәрҙертә. Бер аҙҙан Климовтың янында ултырып барған Эмиль Камалов та дауаханала аңына килә алмай донъя ҡуя.
Был ваҡиға йәмәғәтселектә ҙур шау-шыу тыуҙырҙы. Шуныһы айырыуса иғтибарға алынды: һәләк булған ҡатын – Арбитраж суд судьяһы, ә Климов – бай эшҡыуарҙың улы. Барыһын да “Енәйәт эшенең ахырын аҡса хәл итерме, әллә ғәҙеллек еңерме?” тигән һорау борсоно. Судьяларҙың үҙ хеҙмәттәше намыҫын яҡларына һәм егеткә мөмкин тиклем ҡаты яза бирәсәгенә күптәр ышанғайны. Кеше тапатыусыларға һуңғы йылдарҙа бындай иғтибар булғаны юҡ ине әле. Суд барышында журналистар һәм камералар күплегенән коридор аша үтерлек тә булманы. Объективтарға өйрәнеп бөткәнгәме, әллә үҙ ғәйебен тулыһынса аңлап етмәгәнлектәнме, Илья Климов ултырыштар залына ҡарай ышаныслы йөҙ менән атланы. Аварияла аяғы йәрәхәтләнеүен иҫәпкә алмағанда, йөҙөндә лә, ҡиәфәтендә лә һигеҙ ай изоляторҙа ултырғаны бер нисек тә сағылмай. Быға тиклемге суд ултырыштары киң мәғлүмәт саралары хеҙмәткәрҙәренән тыш үтте. Һуңғыһында ла журналистарҙы залға индермәнеләр.
Тәфтишселәр ғәйепләнеүсегә бер нисә осраҡ буйынса енәйәт эше ҡуҙғатҡайны. Тикшереү барышын ентекле күҙәттек. Ғәҙеллектең тантана итеренә ышандыҡ, әлбиттә. Ултырыштар башлыса ябыҡ шарттарҙа үтһә лә, хөкөм ҡарарын иғлан иткәндә судья хәбәрселәрҙе залға индерҙе.Хөкөм: дүрт йыл да ун ай... Язаның йомшаҡлығы Илья Климовтың зыян күреүсе яҡҡа аҡсалата ярҙамлашыуы менән аңлатыла. Бынан тыш, тикшереү барышында ғәйепләнеүсенең йәш балаһы барлығы асыҡланған. Йәнәһе лә, егет быға тиклем сабыйҙы үҙенеке тип танымаған, ә хәҙер тәүбәһенә килгән. Был “изге” ҡылығы өсөн ул ярлыҡауҙарын һорай. Суд аталыҡ тойғоһоноң ҡапыл барлыҡҡа килеүен иҫәпкә алмаған, шулай ҙа тикшереү барышында ике статья төшөрөп ҡалдырылған. Ғәйепләүселәр Климовты биш йылға төрмәгә ултыртыуҙы һораған булһа ла, мәрхүмдәрҙең туғандары менән яза көтөүсенең үҙ-ара килешеүе арҡаһында тағы ла ике статья енәйәт эшенән алып ташланған.
Климовтың үҙ ғәйебен тулыһынса танып, ғәфү үтенеүе лә хәлгә йоғонто яһамай ҡалмағандыр. Иркенән мәхрүм ителеүҙән тыш, Климов һәләк булған иптәшенең ғаиләһенә 150 мең һум түләргә бурыслы. Әйткәндәй, 4 йыл да 10 ай иҫәбенә изоляторҙа ултырған ваҡыт та инә.
Л. ҒАФАРОВА әҙерләне.