Күптән түгел республикабыҙ­ҙың Салауат ҡалаһы вәкилдәре, Баш­ҡортостандың Милли музейы хеҙмәткәрҙәре, спортсылар, Баш­ҡорт дәүләт филармонияһы артистары ингән делегацияһы Эс­то­нияла үткән рәсми, мәҙәни һәм спорт сараларында ҡат­нашты. Был көндө Палдиски ҡалаһы хакимиәтендә беҙҙең Милли музейҙың “Азатлыҡ бөр­көттәре” тигән күргәҙмәһе асыл­ды. Ул Салауат Юлаевҡа ғына түгел, тотош республикаға, йәғни сәнәғәтенә, мәҙәниәтенә, туризмына ҡағылышлы мәғлүмәттәрҙе сағылдырҙы.
Сәфәр барышында шулай уҡ Таллинндағы “Ағиҙел” башҡорт йәмғиәте ағзалары, Ригалағы “Салауат Юлаев” Балтик халыҡ-ара үҙәге вәкиле менән осрашыуҙар булды, милли батырыбыҙ һәм башҡорттар темаһына фәнни семинар ойошторолдо. Ижади коллективтарҙың сығышы ҡала халҡының күңеленә хуш килде. Шулай уҡ эстон һәм урыҫ тел­дәрендә баҫылып сыҡҡан Салауат Юлаев тураһындағы тәүге китап менән таныштырыу сараһы үткәрелде.
Ҡала көнө айҡанлы Эстония­лағы, атап әйткәндә Палдиски ҡалаһындағы байрам сараларында “Рәсәй таянысы” ойош­маһының Башҡортостан төбәк бүлексәһе рәйесе Рөстәм Ғил­маншин һәм бүлексәнең башҡар­ма директоры Тимур Лоҡманов ҡатнашты. Эстонияла йәшәгән башҡорттар, татарҙар ярҙамында үткәрелгән һабантуй онотолмаҫ­лыҡ тәьҫораттар ҡалдырҙы. Ҡала халҡы ярыштарҙа әүҙем ҡатнаш­ты. Милли көрәш айырыуса ҙур ҡыҙыҡһыныу тыуҙырҙы.
Салауат Юлаевҡа арналған сараларҙы ойоштороуға Палдиски мэрияһы, атап әйткәндә ҡала башлығы урынбаҫары Эльдар Тоонверки менән ҡала көн­дәрен һәм спорт уйындарын үткәреү буйынса башҡарма секре­тарь Ларисса Сарман ҙур тырышлыҡ һалды.