“Америкаға йәки Бөйөк Британияға нисек барып ҡайтырға?” тип баш ватаһығыҙмы? Фатима Мостафина исемендәге 20-се Өфө ҡала башҡорт гимназияһы уҡыусыларының был хыялы тормошҡа ашты ла инде.
Америка-башҡорт интерколледжы тиҫтә йыл милли белем усағы уҡыусылары өсөн йәйге лагерь ойоштора. Унда шөғөлләнгәндәр күптән түгел уҡытыусылары, ата-әсәһе, олатаһы-өләсәһе, киң мәғлүмәт саралары хеҙмәткәрҙәре алдында ике аҙнала өлгәшкән ҡаҙаныштарын күрһәтте. “Лагерҙа бер көн” тип аталған осрашыуға Америка-башҡорт директоры Вячеслов Швайко менән 20-се гимназия етәксеһе Илдар Моталов килде.
Бында 40-ҡа яҡын кеше шөғөлләнә икән. Өфө уҡыусыларынан тыш, Благовещен ҡалаһынан дүрт бала килгән. Уҡытыу мәктәптәге дәрестәрҙән айырыла. Инглиз телен китап ярҙамында түгел, ә ғәмәли эштәр аша өйрәнәләр.
Үҫмерҙәр көндө физик күнегеүҙәрҙән башлай. Уны Американан килгән, Башҡортостанда биш йыл йәшәгән инструктор Джереми Савадж мауыҡтырғыс итеп үткәрә.
Төшкө ашҡа тиклем уҡыусылар инглиз телендә йырҙар өйрәнә, брейк-данс, ҡул эше, спорт менән шөғөлләнә, Интернет серҙәренә төшөнә. Ребекка Эмерик драма дәресендә балаларҙың актерлыҡ һәләтен үҫтерә. Социаль йәһәттән аҙ тәьмин ителгән ғаиләләрҙә тәрбиәләнгәндәр өсөн лидерлыҡ мәктәбе лә бар.
Айырым темаға арналған саралар ойоштороу лагерҙа күркәм йолаға әйләнгән. Әлеге байрамда уларҙа үҙенең һәләтен, өлгөрлөгөн күрһәткәндәр приздар һәм дипломдар менән бүләкләнде.
Интерколледж директоры әйтеүенсә, уҡыусылар алдына ҡуйылған төп шарт шул: дәрестә барыһы ла инглиз телендә генә һөйләшергә тейеш. “Лагерҙың маҡсаты – грамматиканы яттан белеү түгел, ә үҫмерҙәрҙең телмәрен үҫтереү, оялсанлыҡты, баҙнатһыҙлыҡты еңеү”, – тине ул.
Лагерҙа 14 – 17 йәшлек балалар шөғөлләнә. Эште ойоштороуҙа Өфөнөң Совет районы хакимиәтенең дә ярҙамы ҙур: балаларҙы туҡландырыу мәсьәләһе – уларҙың иңендә.
– Проекттың тап беҙҙә тормошҡа ашырылыуына шатбыҙ, балаларҙың йәйге ялы күңелле һәм файҙалы үтә, – тине гимназия директоры Илдар Моталов. – Элек инглиз теле аҙнаһына биш сәғәт уҡытыла ине, хәҙер, ҡыҙғанысҡа ҡаршы, өсәүгә ҡалды. Был бушлыҡты интерколледж ярҙамында тултырабыҙ.
Лагерҙың кәрәклеген шул да раҫлай: Совет районы мәктәптәре араһында 20-се гимназияла инглиз теленән БДИ биргән уҡыусылар өс тапҡырға күберәк. Сифат та юғары.
Лагерҙа шөғөлләнгәндәргә халыҡ-ара стандарттарға ярашлы сертификат бирелә. Яҡшы һөҙөмтәләргә өлгәшкәндәр сит илгә барып ҡайтыу мөмкинлеген ала.
Программа Рәсәйҙең бүтән ҡалаларында ла эшләй башлаған. Бындай лагерҙар 20 урында бар. Башҡортостандағы интерколледж – улар араһында иң ҙуры.