...Зөбәй Үтәғолов, Жәлил Кейекбаев, Ноғман Мусин, Әнисә Таһирова һәм башҡа бихисап абруйлы шәхестәргә белем биргән Маҡар мәктәбе. Ниндәй өлкәне генә алма – һәммәһендә лә ошо белем усағын тамамлағандар хеҙмәт күрһәтә. Яҡшы белем дә, ҡиммәтле тәрбиә лә, рухи үҫеш тә бар был йортта.
150 йылға яҡын элек барлыҡҡа килә әлеге уҡыу йорто. Билдәле, төрлө йылдарҙа байтаҡ үҙгәрештәргә лә дусар була ул. Әммә шуныһы ҡиммәт: бер ҡасан да был белем усағы “көслө мәктәп” исемен юғалтмай.
– Быйылғы уҡыу йылын 133 бала тамамланы. Мәктәпкә Маҡар балалары ғына түгел, күрше ятҡан Ибрай, Иҫәкәй, Һарғай һәм Егән ауылдарынан да йөрөп уҡыйҙар. Музыка мәктәбе эшләй, балалар төрлө түңәрәктәрҙә ихлас шөғөлләнә, – ти директор Гөлнара Хисмәтуллина, мәктәп тормошо менән таныштырып. Заманы шулай, бер мәғлүмәт бигерәк тә иғтибарҙы йәлеп итә: бында – 11 класс. Тимәк, мәктәп тулы, ауылдың да киләсәге бар!
Шул уҡ ваҡытта нисәмә йыл буйы абруй ҡаҙанып килгән белем биреү учреждениеһының эшен юғары кимәлдә алып барыуы еңелдән түгелдер. Был йәһәттән мәктәп коллективына афарин тип әйтергә ҡала. Башҡортостан сәнғәт донъяһының тере легендаһы Мәрйәм апай Солтанованы телгә алһаҡ та күпте әйтергә булыр ине. Хәйер, көслө уҡытыусылар булғанда, ауылдың ғына түгел, илдең киләсәге өсөн дә ҡурҡыныс юҡ.