Ошо кескәй генә йән эйәләренең ғә­жәп хеҙмәтенә хайран ҡалырлыҡ. Ә инде уларҙы те­йе­шенсә тәрбиәләп, мул бал алыу өсөн бөжәктәрҙең үҙенән дә егәрлерәк булыу кәрәктер. Сәйетбаба ауылында йәшәгән Тәғзимә менән Ил­фир Ишмырҙиндар – тап шундай кешеләр.
Ғаилә башлығы эш­ҡыуарлыҡ менән шө­ғөл­ләнһә, хужабикә – шәфҡәт туташы. Бына тигән ике бала тәрбиәләп үҫтергәндәр. ”Эше­беҙ тығыҙ, булғанына шөкөр” тип йәшәмәй улар. Күпләп ҡорт тоталар, йыл да мул бал алалар.
– Башҡалар ҙа ҡорт үрсетеүҙән ҡурҡ­маһын, ифрат ҡыҙыҡлы, килемле шөғөл, – ти Ишмырҙиндар.